ఫేస్‌బుక్ ప్రేమ వలలో మోసం: టెకీ నుంచి రూ.2.36 కోట్లు దోచుకున్న సైబర్ కిలాడీ

హైదరాబాద్ లో ఒక సాఫ్ట్‌వేర్ ఉద్యోగి సైబర్ మోసానికి గురై రూ.2.36 కోట్లు కోల్పోయిన ఘటన వెలుగులోకి వచ్చింది. సైబర్ నేరగాళ్లు ఫేస్‌బుక్ ద్వారా “కోరా” అనే పేరుతో పరిచయం ఏర్పరచుకుని, తాను సింగపూర్‌కు చెందినదని, ముంబయిలో పని చేస్తున్నానని నమ్మించారు. కొద్ది రోజుల సంభాషణల ద్వారా అతని నమ్మకాన్ని గెలుచుకుని నకిలీ వివరాలు చెప్పింది.

తర్వాత పెట్టుబడులు పెడితే భారీ లాభాలు వస్తాయని చెప్పి ఒక సమూహంలో చేర్చింది. మొదట అతను నిరాకరించినప్పటికీ, పదేపదే ఒత్తిడి చేయడంతో చివరకు అంగీకరించాడు. ఒక అప్లికేషన్ ఫైల్ పంపగా, అది ఫోన్‌లో నకిలీ వ్యాపార యాప్‌గా ఇన్‌స్టాల్ అయింది. మరొక నకిలీ వ్యక్తి ద్వారా సూచనలు ఇస్తూ పెట్టుబడులు పెట్టించారు.

సెప్టెంబర్ నుండి డిసెంబర్ మధ్య కాలంలో బాధితుడు పలుమార్లు మొత్తంగా రూ.2.36 కోట్లు బదిలీ చేశాడు. యాప్‌లో లాభాలు చూపించినప్పటికీ డబ్బు తీసుకోలేకపోయాడు. తర్వాత నిందితురాలు స్పందించకపోవడంతో మోసం జరిగినట్లు గ్రహించి పోలీసులను ఆశ్రయించాడు. ఈ సొమ్ము విదేశీ ఖాతాలకు మారినట్లు పోలీసులు గుర్తించారు. గుర్తు తెలియని వ్యక్తులపై నమ్మకం పెట్టుకోవద్దని అధికారులు హెచ్చరిస్తున్నారు.