భారత్‌లో కేసీ-390 తయారీకి ఎంబ్రాయెర్ సిద్ధం

బ్రెజిల్‌కు చెందిన విమాన తయారీ సంస్థ ఎంబ్రాయెర్ భారత్‌లో కేసీ - 390 మిలీనియం విమానాల తయారీకి ఆసక్తి చూపుతోంది. ఇందుకోసం ప్రధాన ఉత్పత్తి కేంద్రాన్ని దేశంలోనే ఏర్పాటు చేసేందుకు సిద్ధంగా ఉన్నామని ఎంబ్రాయెర్ సీఈఓ ఫ్రాన్సిస్కో గోమెజ్ తెలిపారు. భారత వైమానిక దళం నుంచి 80 రవాణా విమానాల ఆర్డర్ వస్తే ప్లాంట్‌ను భారత్‌లోనే స్థాపిస్తామని ఆయన పేర్కొన్నారు. ఇక్కడ తయారయ్యే విమానాలను ఆసియా-పసిఫిక్ దేశాలకు ఎగుమతి చేసే ప్రణాళిక కూడా ఉందన్నారు.

చిన్న రన్‌వేల నుంచి టేకాఫ్ అవగల సామర్థ్యం, వేగంగా బలగాలు మరియు ఆయుధాలను తరలించే సామర్థ్యం కేసీ - 390 మిలీనియం ప్రత్యేకతగా చెప్పబడుతోంది. ఆకాశంలోనే ఇంధనం నింపుకునే సౌకర్యం కూడా దీనికి ఉంది. ఈ విమానాల కోసం భారత్‌లో ఎంఆర్‌ఓ (మరమ్మతు, నిర్వహణ, ఓవర్‌హాల్) కేంద్రాన్ని ఏర్పాటు చేయాలని ఎంబ్రాయెర్ భావిస్తోంది. ప్రస్తుతం ఏఎన్ - 32, ఐఎల్ - 76 విమానాలకు ప్రత్యామ్నాయంగా 80 మీడియం ట్రాన్స్‌పోర్ట్ విమానాలను సమకూర్చుకోవాలని భారత వైమానిక దళం ప్రణాళిక వేస్తోంది. ఈ కాంట్రాక్టుకు ఎయిర్‌బస్ ఎ - 400ఎం, లాక్‌హీడ్ మార్టిన్ సీ - 130జె కూడా పోటీలో ఉన్నాయి.