వేలాది విమానాల రద్దులకు పైలట్ కొరతే కారణమా ?

01:49 AM, 8 డిసెంబర్, 2025

దేశీయ విమాన మార్కెట్లో 63% వాటా కలిగిన అగ్రగామి ఎయిర్‌ లైన్ ఇండిగో, డీజీసీఏ తాజా నిబంధనలను అమలు చేయడంలో విఫలమై భారీ ఇబ్బందులను ఎదుర్కొంటోంది. 2024 జనవరిలో జారీ చేసిన కొత్త నిబంధనలు ఈ ఏడాది నవంబర్ నుంచి అమల్లోకి రావాల్సి ఉందని తెలిసినా, పైలట్లు–క్రూ సిబ్బంది నియామకాలను ముందుగానే చేపట్టకపోవడంతో పరిస్థితి విషమించింది.

రోజూ వందలాది ఫ్లైట్‌లు రద్దవ్వడం, వేలాది ప్రయాణికులు ఇబ్బందులు పడటం యథావిధిగా కొనసాగింది. శీతాకాల రద్దీ కారణంగా డీజీసీఏ తాత్కాలికంగా సడలింపులు ఇవ్వడంతో రవివారంనుంచి కొంత మెరుగుదల కనిపించినా, ఫిబ్రవరి 10 నాటికి నిబంధనలు పూర్తిగా అమల్లోకి రావాల్సి ఉండడంతో ఇండిగో భారీ నియామకాలపై దృష్టి సారించింది.

2026 నాటికి 900 పైలట్ల నియామకం

ఆంగ్లపత్రికల ప్రకారం ఇండిగో ప్రభుత్వం, డీజీసీఏలకు ఇచ్చిన హామీలు:

158 పైలట్లు – ఫిబ్రవరి 10, 2026 లోపు

742 పైలట్లు – 2026 డిసెంబరు లోపు

మొత్తం 900 పైలట్లు అదనంగా నియమించుకోనున్నట్లు వెల్లడించింది.

అదనంగా వచ్చే 12 నెలల్లో:

300 కెప్టెన్లు

600 జూనియర్ ఫస్ట్ అధికారులు నియమించుకుంటామని తెలిపింది.

డీజీసీఏకు ఇండిగో సమర్పించిన వివరాలు

250 జూనియర్ మొదటి అధికారులకు ప్రస్తుతం శిక్షణ ఇస్తోంది.

అవసరాలను బట్టి 300 కెప్టెన్లు, 600 ఫస్ట్ అధికారులను నియమించుకోవాలని ప్రణాళిక.

కంపెనీలో ఇప్పటికే 2,357 కెప్టెన్లు, 2,194 ఫస్ట్ అధికారులు ఉన్నారు.

ఈ నెలాఖరు వరకు 25 కెప్టెన్లు, 35 ఫస్ట్ అధికారులు అదనంగా చేరనున్నారు.

2026 జనవరిలో ఇంకొం 28 కెప్టెన్లు, 35 ఫస్ట్ అధికారులు.

2026 ఫిబ్రవరి 10 నాటికి 15 కెప్టెన్లు, 20 ఫస్ట్ అధికారులు చేరనున్నారు.

గడువు నాటికి ఇండిగో వద్ద 2,425 కెప్టెన్లు, 2,284 ఫస్ట్ అధికారులు ఉంటారు.

ఫిబ్రవరి గడువు ఎందుకు కీలకం?

డీజీసీఏ కొత్త నిబంధనలు (నవంబర్ 1 నుంచి అమల్లో):

పైలట్లు వారానికి రెండు రోజులు మాత్రమే రాత్రివేళ (12 am–6 am) ల్యాండింగ్ చేయాలి

వరుసగా రెండు రాత్రులు పనిచేస్తే, మూడవ రోజు ఓవర్‌డే రెస్ట్ తప్పనిసరి

ఇతర ఎయిర్‌లైన్ల రాత్రి సర్వీసులు తక్కువగా ఉండటం, అవసరాలకు తగ్గట్టుగా నియామకాలు ఇప్పటికే పూర్తి కావడం వల్ల పెద్దగా ఇబ్బందులు కనిపించలేదు. అయితే ఇండిగో రాత్రి సర్వీసులు అధికంగా ఉండటం, ఫ్లీట్ పెద్దదిగా ఉండటంతో సిబ్బంది అవసరం భారీగా పెరిగింది.