టీటీడీలో ఫుడ్ అనాలసిస్ ల్యాబ్‌ను ఓపెన్ చేసిన సీఎం

తిరుమల పవిత్రతను కాపాడుతూ, శ్రీవారి భక్తులకు మరింత నాణ్యమైన సేవలు అందించేందుకు టీటీడీ చేస్తున్న కృషి ప్రశంసనీయం. కోట్లాది మంది భక్తుల నమ్మకం, విశ్వాసాలను మరింత బలోపేతం చేసే దిశగా టీటీడీ మరో కీలక అడుగు వేసింది. స్టేట్ ఫుడ్ ల్యాబొరేటరీ మరియు FSSAI సంయుక్తంగా, టీటీడీ సహకారంతో సుమారు రూ.25 కోట్ల వ్యయంతో నిర్మించిన అత్యాధునిక ఫుడ్ అనాలిసిస్ ల్యాబ్‌ను ప్రారంభించడం జరిగింది. అత్యున్నత ప్రమాణాలతో రూపొందించిన ఈ ల్యాబ్ ద్వారా ప్రసాదాల తయారీలో ఉపయోగించే ముడి పదార్థాల నాణ్యతను సూక్ష్మ స్థాయిలో పరిశీలించే సౌకర్యం అందుబాటులోకి వచ్చింది.

ఈ ల్యాబ్‌లో ఏర్పాటు చేసిన ఈ-టంగ్, ఈ-నోస్ వంటి ఆధునిక సాంకేతిక పరికరాల సహాయంతో ఆహార పదార్థాల రుచి, వాసనలను డిజిటల్ పద్ధతిలో ఖచ్చితంగా విశ్లేషించవచ్చు. ఇది భక్తులకు అందించే ప్రసాదాల నాణ్యతను మరింత మెరుగుపరచడంలో కీలక పాత్ర పోషిస్తుంది. ఆహార భద్రత మరియు నాణ్యతపై ప్రత్యేక దృష్టి సారిస్తూ, ఈ సదుపాయం ద్వారా పారదర్శకతను కూడా పెంపొందించనున్నారు.

అలాగే, భక్తులకు త్వరితగతిన శ్రీవారి దర్శనం కల్పించడం మరియు రద్దీ నియంత్రణను సమర్థవంతంగా నిర్వహించడం లక్ష్యంగా ఏర్పాటు చేసిన ఇంటిగ్రేటెడ్ కమాండ్ కంట్రోల్ సెంటర్‌ను కూడా సందర్శించారు. AI ఆధారిత ఈ కేంద్రం ద్వారా జనసాంద్రత, దర్శనం కోసం వేచి ఉండే సమయం, వాహనాల రాకపోకలు, వసతి మరియు వైద్య అత్యవసర పరిస్థితులను ఒకే ప్లాట్‌ఫామ్‌లో రియల్ టైమ్‌లో పర్యవేక్షించవచ్చు. ముందస్తుగా రద్దీ పరిస్థితులను అంచనా వేసి క్యూ మేనేజ్‌మెంట్‌ను సమర్థంగా నిర్వహించే ఈ సాంకేతిక పరిజ్ఞానం ద్వారా భక్తులకు మరింత సౌకర్యవంతమైన దర్శన అనుభవం కల్పించనున్నారు. పవిత్రత, ఆధ్యాత్మికత, సౌకర్యం మరియు ప్రశాంతతను సమన్వయం చేస్తూ టీటీడీ చేపడుతున్న ఈ చర్యలు భక్తుల మనోభావాలను కాపాడే దిశగా విశేషంగా ఉపయోగపడుతున్నాయి.