2028 నాటికి ప్రతి గ్రామానికి రోడ్లు, తాగునీటి సౌకర్యం – సీఎం చంద్రబాబు!

ఆంధ్రప్రదేశ్ ముఖ్యమంత్రి నారా చంద్రబాబు నాయుడు రాష్ట్రంలోని అన్ని గ్రామాలకు 2028 డిసెంబరు నాటికి రోడ్లు మరియు తాగునీటి సౌకర్యం కల్పించాలని అధికారులను ఆదేశించారు. ఉండవల్లిలోని తన నివాసంలో ఉప ముఖ్యమంత్రి పవన్ కల్యాణ్తో జరిగిన సమావేశంలో పంచాయతీరాజ్, గ్రామీణాభివృద్ధి శాఖల పనితీరును సమీక్షించారు. గ్రామీణ మౌలిక వసతులకు అత్యధిక ప్రాధాన్యం ఇవ్వాలని, తాగునీటి సమస్యలు తలెత్తకుండా దశల వారీ ప్రణాళిక సిద్ధం చేసి మూడేళ్లలో అమలు చేయాలని నిర్ణయించారు. జల జీవన్ మిషన్ కింద జరుగుతున్న మరియు చేపట్టబోయే పనులు, ఏప్రిల్ నుంచి ప్రారంభమయ్యే వీబీ జీరామ్‌జీ కార్యక్రమం, 16వ ఆర్థిక సంఘం నిధులతో చేపట్టే ప్రాజెక్టులపై చర్చించారు. తాగునీటి కొరత ఉన్న గ్రామాలకు సమీప జలాశయాల నుంచి నీటిని సరఫరా చేసే అవకాశాలను పరిశీలించాలని సీఎం సూచించారు.

రాష్ట్రంలోని పలు పంచాయతీల్లో చేపట్టిన మ్యాజిక్ డ్రెయిన్ల పనులపై పవన్ కల్యాణ్ సీఎంకు వివరించారు. అన్ని పంచాయతీల్లో ఈ తరహా డ్రెయిన్లు నిర్మించి పారిశుద్ధ్య నిర్వహణను బలోపేతం చేయవచ్చని పేర్కొన్నారు. వేసవికాలంలో నీటిపారుదల శాఖ పరిధిలోని డ్రెయిన్లలో పూడికతీత పనులు పూర్తి చేసి రైతులు విత్తనాలు వేయకముందే పనులు ముగించాలని సూచించారు. క్లిష్టమైన ఆర్థిక పరిస్థితుల్లోనూ గ్రామాభివృద్ధికి నిధులు కేటాయిస్తున్న సీఎంకు ఉప ముఖ్యమంత్రి ధన్యవాదాలు తెలిపారు.