వైజాగ్‌ లో క్యాప్‌జెమినీ...

ప్రముఖ ఐటీ సంస్థ క్యాప్‌జెమినీ (Capgemini) త్వరలోనే విశాఖపట్నంలో కార్యకలాపాలు ప్రారంభించేందుకు సన్నాహాలు చేస్తోంది. ఈ మేరకు కంపెనీ ప్రతినిధులు ఇటీవల ఐటీ శాఖ మంత్రి నారా లోకేశ్‌ను కలిసి చర్చలు జరిపారు.

గురువారం కంపెనీ బృందం భూముల పరిశీలన కోసం నగరానికి వచ్చింది. భీమిలి ఆర్డీవో సంగీత్ మాధుర్‌, విశాఖ రూరల్‌ తహశీల్దారు పాల్ కిరణ్‌, ఈజ్ ఆఫ్ డూయింగ్ బిజినెస్ ప్రతినిధులు మరియు ఏపీఐఐసీ అధికారులు ఈ పరిశీలనలో పాల్గొన్నారు. బృందం మొదట మధురవాడ ఐటీ పార్క్‌లోని హిల్-1 వద్ద మిరాకిల్ సొల్యూషన్స్‌ సమీపంలోని 20 ఎకరాల భూమిని పరిశీలించింది.

తర్వాత అడవివరంలో గూగుల్ డేటా సెంటర్ కోసం కేటాయించిన ప్రాంతం పక్కన ఉన్న భూమిని కూడా పరిశీలించారు. అదనంగా, ఆనందపురం మరియు విశాఖ రూరల్ మండలాల్లో మరికొన్ని ప్రాంతాలను కూడా పరిశీలించారు. కంపెనీ ప్రతినిధులు వీటి పై తమ అభిప్రాయాన్ని ప్రభుత్వానికి నివేదించనున్నారు. ఈ పరిశీలనతో విశాఖలో మరో పెద్ద ఐటీ కేంద్రం ఏర్పడే అవకాశాలు బలంగా కనిపిస్తున్నాయి.