కెనడా ఇమిగ్రేషన్ పాలసీలో కీలక మార్పు.. SUV వీసా రద్దు

విదేశీయులుకు తమ దేశంలో వ్యాపారాలు ప్రారంభించేందుకు అవకాశం కల్పిస్తున్న స్టార్టప్ వీసా ప్రోగ్రామ్‌ను కెనడా తాత్కాలికంగా నిలిపివేసింది. ఈ ప్రోగ్రామ్‌కు బదులుగా కొత్త వ్యాపార ఇమిగ్రేషన్ స్కీమ్‌ను తీసుకురావాలని కెనడా ప్రభుత్వం యోచిస్తున్నట్లు సమాచారం. ఈ కొత్త స్కీమ్‌ను 2026 లో పైలట్ ప్రాజెక్ట్‌గా ప్రారంభించే అవకాశం ఉందని అధికారులు వెల్లడించారు.

Immigration, Refugees and Citizenship Canada (IRCC) తెలిపిన వివరాల ప్రకారం, కెనడాలో అమలులో ఉన్న వ్యాపార ఇమిగ్రేషన్ ప్రోగ్రామ్‌లను సమగ్రంగా పునర్నిర్మించే ప్రక్రియలో భాగంగా స్టార్టప్ వీసా (SUV) వర్క్ పర్మిట్ దరఖాస్తులను నిలిపివేశారు. ఇక పై ఈ ప్రోగ్రామ్ కింద కొత్తగా వర్క్ పర్మిట్ కోసం దరఖాస్తులను స్వీకరించబోమని స్పష్టం చేశారు.

అయితే, ఇప్పటికే స్టార్టప్ వీసా కింద వర్క్ పర్మిట్ పొందినవారు దానిని పొడిగించుకునేందుకు చేసుకునే దరఖాస్తులకు మినహాయింపు ఉంటుందని ఐఆర్‌సీసీ వెల్లడించింది. ఈ నిర్ణయం వల్ల ప్రస్తుతం కెనడాలో వ్యాపారాలు నిర్వహిస్తున్న వారికి ఎలాంటి ఇబ్బంది ఉండదని పేర్కొంది.

కొత్తగా తీసుకురానున్న స్కీమ్ కెనడా దీర్ఘకాలిక ఇమిగ్రేషన్ లక్ష్యాలకు అనుగుణంగా ఉంటుందని అధికారులు తెలిపారు. విదేశీ వ్యాపారవేత్తలకు మరింత అనుకూల వాతావరణం కల్పించడం, కొత్త స్టార్టప్‌లను ప్రోత్సహించడం లక్ష్యంగా ఈ మార్పులు చేపట్టినట్లు పేర్కొన్నారు. అయితే ప్రస్తుత స్టార్టప్ వీసా ప్రోగ్రామ్‌కు, రాబోయే కొత్త స్కీమ్‌కు మధ్య ఉన్న తేడాల పై ఇప్పటివరకు స్పష్టత ఇవ్వలేదు. ఈ కొత్త స్టార్టప్ వీసా ప్రాజెక్ట్‌కు సంబంధించిన పూర్తి వివరాలను 2026 లో వెల్లడిస్తామని తెలిపారు.