ది ప్యారడైజ్ ప్రీమియర్స్‌కు అదిరిపోయే రెస్పాన్స్.. హౌస్‌ఫుల్స్!

నాచురల్ స్టార్ నాని హీరోగా, దసరా ఫేమ్ శ్రీకాంత్ ఓదెల దర్శకత్వంలో తెరకెక్కిన ది ప్యారడైజ్‌పై తెలుగు ప్రేక్షకుల్లో భారీ ఆసక్తి నెలకొంది. వీరిద్దరి కాంబినేషన్‌లో వస్తున్న ఈ చిత్రం అనౌన్స్‌మెంట్‌ నుంచే మంచి హైప్‌ను సొంతం చేసుకుంది. సినిమా విడుదల తేదీ దగ్గరపడటంతో ఇప్పుడు అడ్వాన్స్ బుకింగ్స్‌పై అందరి దృష్టి పడింది.

మేకర్స్ ప్రపంచవ్యాప్తంగా ఒక రోజు ముందుగానే ప్రీమియర్స్ నిర్వహించేందుకు సిద్ధమయ్యారు. బుకింగ్స్ ప్రారంభం కావడంతో ఆంధ్రప్రదేశ్, తెలంగాణలోని పలు ప్రాంతాల్లో ప్రేక్షకుల నుంచి మంచి స్పందన కనిపిస్తోంది. టికెట్ ధరలు, ప్రాంతాలతో సంబంధం లేకుండా కొన్ని షోలు వేగంగా ఫుల్ అవుతున్నట్లు సమాచారం. మరిన్ని మల్టీప్లెక్స్‌లలో బుకింగ్స్ ఇంకా ప్రారంభం కావాల్సి ఉండటంతో రానున్న రోజుల్లో మరిన్ని షోలు అందుబాటులోకి వచ్చే అవకాశం ఉంది. ప్రీమియర్స్‌కు ముందే కనిపిస్తున్న ఈ స్పందన సినిమాపై నెలకొన్న అంచనాలను మరింత పెంచుతోంది.