

పిల్లలు అడిగింది దక్కకపోతే ఏడవడం, అలగడం సహజం. అయితే ప్రస్తుతం కొందరు చిన్నారులు తమ కోరికలు నెరవేరకపోతే ఇతరులను కొట్టడం, తమను తాము గాయపరుచుకోవడం వంటి ప్రవర్తనతో తీవ్ర అసహనాన్ని వ్యక్తం చేస్తున్నారు. చిన్న వయసులోనే కోపం అదుపు తప్పడానికి పెంపకం, కుటుంబ వాతావరణం, వ్యక్తిగత స్వభావం, పాఠశాల పరిస్థితులు వంటి అనేక అంశాలు కారణమవుతాయని నిపుణులు చెబుతున్నారు. పిల్లలకు అడిగినవన్నీ ఇవ్వడం, క్రమశిక్షణ విషయంలో స్పష్టత లేకపోవడం, కుటుంబ సభ్యుల మధ్య సరైన సంభాషణ లేకపోవడం వారిలో సహనం, సహానుభూతి, సర్దుకుపోయే గుణాలను తగ్గించవచ్చని సూచిస్తున్నారు. పిల్లలకు ప్రేమను అందిస్తూనే స్పష్టమైన హద్దులు విధించాలని, ప్రతి విషయానికి కారణాలను వివరించాలని నిపుణులు సూచిస్తున్నారు. కుటుంబ సభ్యులంతా పిల్లల పెంపకంలో ఒకే విధమైన విధానాన్ని అనుసరిస్తూ, వారితో నాణ్యమైన సమయాన్ని గడపాలని చెబుతున్నారు.
మారుతున్న సామాజిక పరిస్థితులు, అధిక స్క్రీన్ వినియోగం కూడా పిల్లల ఆలోచనలు, ప్రవర్తనపై ప్రభావం చూపుతున్నాయని నిపుణులు అభిప్రాయపడుతున్నారు. వీడియో గేమ్లలో హింస, వినోద కార్యక్రమాల్లో దూకుడుగా ప్రవర్తించే పాత్రలు, సోషల్ మీడియా రీల్స్లో కనిపించే అవాస్తవ జీవనశైలి చిన్నారులపై ప్రభావం చూపవచ్చు. కొన్ని ప్రవర్తనా సమస్యలు లేదా మానసిక పరిస్థితుల వల్ల కూడా పిల్లల్లో అతి చురుకుదనం, ఎదురు తిరిగే స్వభావం, కోపాన్ని నియంత్రించుకోలేకపోవడం వంటి లక్షణాలు కనిపించవచ్చని, అవసరమైతే నిపుణుల సలహా తీసుకోవాలని సూచిస్తున్నారు. పాఠశాలల్లోనూ మార్కులకే కాకుండా పిల్లల స్నేహపూర్వక ప్రవర్తన, ఇతరులకు సాయం చేయడం, వస్తువులు పంచుకోవడం, ఇతరుల విజయాన్ని స్వీకరించే తీరుపై దృష్టి పెట్టాలి. తెరపై కనిపించేవన్నీ వాస్తవాలు కావని పిల్లలకు వివరించడంతో పాటు, కుటుంబ సభ్యులంతా కలిసి చూసే అలవాటు పెంచాలని నిపుణులు సూచిస్తున్నారు.




















కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!