శ్రీకాంత్ ఓదెల: సుకుమార్ టీమ్‌లో చోటు కోసం మూడేళ్ల ఎదురుచూపు!

దర్శకుడు శ్రీకాంత్ ఓదెల సినీ ప్రయాణం వెనుక ఉన్న ఆసక్తికరమైన విషయాన్ని తాజాగా వెల్లడించారు. ప్రముఖ లిరిసిస్ట్ కాసర్ల శ్యామ్‌తో జరిగిన చిట్‌చాట్‌లో ఆయన మాట్లాడుతూ.. సినీ రంగంలోకి అడుగుపెట్టిన సమయంలో లెక్కల మాస్టారు సుకుమార్ వద్ద దర్శకత్వ శాఖలో పనిచేయడమే తన ప్రధాన లక్ష్యమని తెలిపారు. అయితే సుకుమార్‌ను కలవడం అంత సులభం కాకపోవడంతో ఆయన దృష్టిలో పడేందుకు ఒక అసాధారణ మార్గాన్ని ఎంచుకున్నారు. అప్పట్లో సుకుమార్ హైదరాబాద్‌లోని శ్రీనగర్ కాలనీలో నివసించేవారని, తాను ప్రతిరోజూ తెల్లవారుజామున సుమారు 5 గంటలకే ఆయన అపార్ట్‌మెంట్ వద్దకు వెళ్లి నిశ్శబ్దంగా ఎదురుచూసేవాడినని శ్రీకాంత్ తెలిపారు.

సుకుమార్ రాత్రివేళల్లో కథా చర్చలు, స్క్రిప్ట్ వర్క్ పూర్తి చేసుకుని ఆలస్యంగా ఇంటికి వచ్చినా.. మరుసటి ఉదయం శ్రీకాంత్ అక్కడే ఉండేవారు. సుకుమార్ ఎదురుపడినప్పుడు “గుడ్ మార్నింగ్ సార్.. గుడ్ నైట్ సార్” అని మాత్రమే చెప్పి వెళ్లిపోయేవారని తెలిపారు. ఇలా దాదాపు మూడేళ్ల పాటు తన ప్రయత్నాన్ని కొనసాగించడంతో చివరకు సుకుమార్ ఆయనను గమనించి తన గురించి ప్రశ్నించినట్లు శ్రీకాంత్ చెప్పారు. సినిమాపై తనకున్న ప్యాషన్, సుకుమార్ దగ్గర పనిచేయాలన్న కోరికను వివరించడంతో ఆయనకు కొన్ని పరీక్షలు పెట్టి తన దర్శకత్వ బృందంలో అవకాశం ఇచ్చారని తెలిపారు. అనంతరం నాన్నకు ప్రేమతో, రంగస్థలం చిత్రాలకు అసిస్టెంట్ డైరెక్టర్‌గా పనిచేశారు. దసరాతో దర్శకుడిగా తన సత్తా చాటిన శ్రీకాంత్ ఓదెల.. ప్రస్తుతం ది ప్యారడైజ్‌తో మరోసారి ప్రేక్షకుల దృష్టిని ఆకర్షిస్తున్నారు.