పెరుగుతున్న పైరసీకి ఆఖరి చెక్ ఇదేనంటున్న ఆర్జీవీ

సినిమా పైరసీపై గత కొన్ని రోజులుగా జరుగుతున్న చర్చలకు దర్శకుడు రామ్ గోపాల్ వర్మ తనదైన శైలిలో స్పందించారు. “రోబిన్ హుడ్ రవి” వివాదం నేపథ్యంలో పైరసీకి అసలు కారణం ఎవరో తన సోషల్ మీడియా పోస్టులో స్పష్టం చేశారు.

ఎక్స్‌లో పోస్ట్ చేసిన వర్మ వ్యాఖ్యలు ఇలా ఉన్నాయి:
“పైరసీ ఎప్పటికీ ఆగదు. టెక్నాలజీ అడ్వాన్స్ కావడం లేదా పోలీసులు బలహీనంగా ఉండడమే కారణం కాదు. లక్షల మంది పైరసీ సినిమాలు చూడాలనుకునేంత వరకు ఎప్పుడూ రవిలాంటి వాళ్లు ఉంటారు. రవిని రోబిన్ హుడ్‌తో పోల్చటం హాస్యాస్పదం.”

వర్మ అన్నారు,
“ఈనాటి ప్రమాణాల ప్రకారం రోబిన్ హుడ్ హీరో కాదు. అతను మొదటి టెరరిస్ట్‌లాంటోడు. ధనవంతులపై దాడి చేసి వారి డబ్బును పేదలకు ఇస్తాడు. ధనవంతుడు కావడం తప్పు కాదు. దొంగతనాన్ని గొప్పగా చూపించడం ప్రమాదకరం.”

సినిమా టికెట్లు ఖరీదైపోయాయని కొందరు చేసే వాదనను ఖండిస్తూ,
“అలా అయితే BMW షోరూమ్‌లోకి వెళ్లి కార్లు దొంగిలించి పేదలకు పంచాలి అన్న భావనకూ మద్దతు ఇవ్వాలా?” అని ప్రశ్నించారు.

ఇలాంటి ఆలోచన సమాజాన్ని అల్లకల్లోలానికి తీసుకెళ్తుంది అని హెచ్చరించిన వర్మ, పైరసీ అనేది నైతిక విప్లవం వల్ల కాదు—ఒకటే కారణం, సౌలభ్యం అని పేర్కొన్నారు.
ఫిల్మ్ ఫ్రాటర్నిటీకి చెందిన చాలామంది కూడా డబ్బు, సమయం ఆదా చేసుకోవడానికి పైరసీని ఎంచుకుంటారని అన్నారు.

పైరసీని పూర్తిగా ఆపాలంటే కఠిన నిర్ణయాలే మార్గమని చెప్పిన వర్మ ఇలా సూచించారు:
“సప్లయర్‌ను మాత్రమే కాదు, పైరసీ కంటెంట్ చూసే ప్రేక్షకుడినీ నేరంగా పరిగణించాలి. పైరేట్‌ను పట్టుకోవడం కష్టం కానీ ప్రేక్షకుడిని పట్టుకోవడం చాలా ఈజీ. పైరసీ చూస్తున్న 100 మందిని అరెస్ట్ చేసి వారి పేర్లను పబ్లిక్ చేయాలి.”

ఆర్జీవీ వ్యాఖ్యలు సోషల్ మీడియాలో పెద్ద చర్చకు దారి తీశాయి.