ఒకే పార్ట్ గా రాజమౌళి‘వారణాసి’ !

భారతీయ సినీ పరిశ్రమలో అత్యంత ప్రతిష్టాత్మక దర్శకుడిగా గుర్తింపు పొందిన ఎస్.ఎస్. రాజమౌళి ప్రస్తుతం తన కెరీర్‌లోనే అత్యంత భారీ ప్రాజెక్ట్‌గా భావిస్తున్న ‘వారణాసి’ చిత్ర నిర్మాణంలో నిమగ్నమై ఉన్నారు. ప్రాచీన పురాణ గాథ రామాయణ ఆధారంగా తెరకెక్కుతున్న ఈ గ్లోబ్‌ట్రాటింగ్ యాక్షన్ అడ్వెంచర్‌లో మహేష్ బాబు, పృథ్వీరాజ్ సుకుమారన్ ప్రధాన పాత్రల్లో నటిస్తుండగా, ప్రియాంక చోప్రా కీలక పాత్రలో కనిపించనున్నారు. ఆఫ్రికా అడవుల నుంచి అంటార్కిటికా మంచు ఖండాల వరకు విస్తరించిన కథాంశం ఈ సినిమాపై భారీ అంచనాలను పెంచింది.

చిత్రం రెండు భాగాలుగా వస్తుందన్న ప్రచారానికి రాజమౌళి తాజాగా ఫుల్ స్టాప్ పెట్టారు. గత నవంబర్‌లో హైదరాబాద్‌లో వారణాసి గ్లింప్స్ విడుదల సందర్భంగా హాలీవుడ్ మీడియా సంస్థ స్క్రీన్ రాంట్‌కు ఇచ్చిన ఇంటర్వ్యూలో, ఈ చిత్రం సుమారు మూడు గంటల నిడివితో ఒక్క భాగంగానే విడుదల అవుతుందని స్పష్టం చేశారు. ప్రారంభ దశలో రెండు భాగాల ఆలోచన ఉన్నప్పటికీ, షూటింగ్ మొదలైన వెంటనే ఆ నిర్ణయాన్ని విరమించుకున్నామని తెలిపారు. IMAX 1.43:1 ఫార్మాట్‌లో చిత్రీకరణపై మాట్లాడుతూ, కథ విస్తృతి దృష్ట్యా భారీ విజువల్ ఫార్మాట్ అవసరమైందన్నారు. విడుదలకు ఇంకా సమయం ఉన్నప్పటికీ, వారణాసి ఇప్పటికే ప్రపంచవ్యాప్తంగా అపూర్వమైన హైప్‌ను సృష్టిస్తోంది.