యామీ గౌతమ్‌పై ఆర్జీవీ ప్రశంసలు..

72వ జాతీయ చలనచిత్ర అవార్డుల్లో రాజకీయ యాక్షన్ థ్రిల్లర్ 'ఆర్టికల్ 370' ఘన విజయం సాధించింది. ఈ చిత్రంలో అద్భుతమైన నటన కనబరిచిన యామీ గౌతమ్ ఉత్తమ నటిగా జాతీయ అవార్డును అందుకుంది. ఇదే చిత్రానికి ఉత్తమ ఫీచర్ ఫిల్మ్ అవార్డు దక్కగా, శాశ్వత్ సచ్‌దేవ్ ఉత్తమ సంగీత దర్శకుడిగా జాతీయ అవార్డును సొంతం చేసుకున్నారు. యామీ విజయంపై సినీ ప్రముఖులు, అభిమానులు సోషల్ మీడియాలో శుభాకాంక్షలు తెలియజేస్తున్నారు.

ఈ సందర్భంగా దర్శకుడు రామ్ గోపాల్ వర్మ సోషల్ మీడియాలో స్పందిస్తూ యామీ గౌతమ్‌ను ప్రశంసించారు. తనకు అవార్డులపై నమ్మకం లేకపోయినా, కృషి, నిజాయితీ, వృత్తిపట్ల నిబద్ధతకు దక్కే గుర్తింపును మాత్రం విశ్వసిస్తానని పేర్కొన్నారు. ఆర్టికల్ 370 యామీ మనస్ఫూర్తిగా నమ్మిన కథ అని, ఆమె పట్టుదల, ధైర్యం, రిస్క్ తీసుకునే తత్వం, ఆత్మవిశ్వాసమే ఈ విజయానికి కారణమని కొనియాడారు. భవిష్యత్తులో ఆమె మరెన్నో విజయాలు సాధిస్తుందని ఆశాభావం వ్యక్తం చేశారు. దర్శకుడు ఆదిత్య ధర్‌ను వివాహం చేసుకున్న యామీ, నువ్విలా, గౌరవం, కొరియర్ బాయ్ కళ్యాణ్ చిత్రాల ద్వారా తెలుగు ప్రేక్షకులకు కూడా సుపరిచితురాలు.