నిధి అగర్వాల్‌ నెక్స్ట్‌ మూవీపై భారీ అంచనాలు!

‘ది రాజాసాబ్’, ‘హరిహర వీరమల్లు’ వంటి సినిమాలు ఆశించిన స్థాయిలో విజయం సాధించకపోవడంతో టాలీవుడ్‌ యంగ్‌ బ్యూటీ నిధి అగర్వాల్‌ సినిమాల ఎంపికలో ఆచితూచి అడుగులు వేస్తున్నట్లు తెలుస్తోంది. కొంతకాలంగా సినిమాలకు దూరంగా ఉన్న ఆమె.. ఈ విరామాన్ని కొత్త తరహా కథతో రీ-ఎంట్రీ ఇవ్వడానికి ఉపయోగించుకుంటున్నారు. కమర్షియల్‌ కథలకు భిన్నంగా, కథానాయిక పాత్రకు ప్రాధాన్యం ఉన్న మైథాలజికల్‌ థ్రిల్లర్‌ను ఎంచుకున్నారు. దర్శకుడు శ్రీనివాస్‌ గోపిశెట్టి తెరకెక్కిస్తున్న ఈ చిత్రాన్ని వరాహ్‌ ఫిల్మ్స్‌ బ్యానర్‌పై సునీత్‌ పడోల్కర్‌ నిర్మిస్తున్నారు. హైదరాబాద్‌లో పూజా కార్యక్రమాలతో ఈ సినిమా లాంఛనంగా ప్రారంభమైంది.

ఈ సినిమాకు సంబంధించిన అనౌన్స్‌మెంట్‌ పోస్టర్‌ ఆసక్తిని పెంచుతోంది. సంప్రదాయ పట్టుచీరలో చేతిలో దీపంతో కనిపిస్తున్న నిధి వెనుక ఆరు చేతులతో కూడిన దైవిక ఉగ్రరూపాన్ని చూపించడం ద్వారా కథపై ఆసక్తిని రేకెత్తించారు. పురాణాల నేపథ్యానికి థ్రిల్లర్‌ అంశాలను జోడిస్తూ తెరకెక్కుతున్న ఈ లేడీ ఓరియెంటెడ్‌ చిత్రంలో నిధి పాత్ర కీలకంగా ఉండనుంది. గ్లామర్‌ పాత్రలకు భిన్నంగా నటనకు ప్రాధాన్యమున్న పాత్రను ఎంచుకున్న నిధి.. ఈ సినిమాతో తన కెరీర్‌లో కొత్త మలుపు తీసుకురాగలరా అనే ఆసక్తి నెలకొంది.