ఆంధ్రప్రదేశ్‌లో తీవ్ర కరువు.. రైతుల్లో ఆందోళన

ఆంధ్రప్రదేశ్‌లో ఖరీఫ్‌-2026 సీజన్‌లో తీవ్ర వర్షాభావ పరిస్థితుల నేపథ్యంలో ప్రభుత్వం 21 జిల్లాల్లోని 388 మండలాలను కరువు ప్రభావిత ప్రాంతాలుగా ప్రకటించింది. వీటిలో 283 మండలాలను తీవ్ర కరువు, 105 మండలాలను మధ్యస్థ కరువు ప్రాంతాలుగా వర్గీకరించింది. రాయలసీమతో పాటు ఉమ్మడి గుంటూరు, ప్రకాశం ప్రాంతాల్లో కరువు తీవ్రత అధికంగా ఉన్నట్లు ప్రభుత్వం పేర్కొంది. జూన్‌ నుంచి ఆగస్టు వరకు రాష్ట్రంలో 53.4 శాతం వర్షపాతం లోటు నమోదైనట్లు అధికారిక ఉత్తర్వుల్లో వెల్లడించింది.

రాష్ట్రంలోని 688 మండలాల్లో 388 మండలాలను మాత్రమే కరువు జాబితాలో చేర్చడంపై రైతు, వ్యవసాయ కార్మిక సంఘాలు అభ్యంతరాలు వ్యక్తం చేస్తున్నాయి. అమరావతి, కుప్పం ప్రాంతాల్లోని మండలాలు కూడా కరువు జాబితాలో ఉన్నట్లు పలు నివేదికలు పేర్కొన్నాయి. అయితే మిగిలిన 300 మండలాలను జాబితాలో చేర్చకపోవడంపై విమర్శలు వస్తున్నాయి. కరువు ప్రభావిత మండలాల్లో రైతులకు రుణాల రీషెడ్యూల్‌, ఇతర సహాయక చర్యలకు ప్రభుత్వం ఆదేశాలు జారీ చేసింది