యాసపై ట్రోలింగ్‌.. కీలక వ్యాఖ్యలు చేసిన పార్వతి తిరువోతు

దక్షిణాది భాషలు, యాసలను పలికే విషయంలో నటులు ఎదుర్కొంటున్న ట్రోలింగ్‌పై నటి పార్వతి తిరువోతు స్పందించారు. ఇతర భాషల్లో నటించేటప్పుడు యాస విషయంలో సహజంగానే కొన్ని ఇబ్బందులు ఎదురవుతాయని ఆమె పేర్కొన్నారు. ఒక భాషను నేర్చుకుని, దాన్ని సహజంగా మాట్లాడటం ఒక్కరోజులో సాధ్యమయ్యే విషయం కాదని అన్నారు. ప్రేక్షకులకు సహజమైన నటన అందించడమే తన లక్ష్యమని, అందుకే కొత్త భాషలు నేర్చుకోవడంపై ఆసక్తి చూపుతానని తెలిపారు.

వేరే భాషలో అవకాశం వచ్చినప్పుడు పాత్రకు అవసరమైన శిక్షణ తీసుకోవడానికి తాను సిద్ధంగా ఉంటానని పార్వతి చెప్పారు. అయితే పాత్రను సరిగ్గా పోషించలేనని భావిస్తే ఆ అవకాశాన్ని తిరస్కరించడానికి కూడా వెనుకాడనని, తన స్థానంలో డైలాగ్‌లను మెరుగ్గా చెప్పగల డబ్బింగ్‌ కళాకారిణిని తీసుకుంటే సంతోషిస్తానని తెలిపారు. ఈ కారణంగా గతంలో కొన్ని సినిమాలను వదులుకున్న సందర్భాలు ఉన్నాయని వెల్లడించారు. నటనకు ప్రాధాన్యమున్న పాత్రలను ఎంచుకుంటూ వరుస చిత్రాలతో అలరిస్తున్న పార్వతి.. ఇటీవల ‘ప్రథమ దృష్ట్య కుట్టక్కర్‌’ చిత్రంతో ప్రేక్షకుల ముందుకు వచ్చారు.