ప్రపంచ సవాళ్లకు భారత్‌ మార్గదర్శకం - మోహన్‌ భాగవత్‌

ఆర్‌ఎస్‌ఎస్‌ చీఫ్‌ మోహన్‌ భాగవత్‌ భారత్‌ ఆధ్యాత్మిక, తాత్విక జ్ఞాన సంపదకు ప్రపంచ సవాళ్లను ఎదుర్కోవడంలో పాత్ర ఉందని అన్నారు. ముంబయిలో జరిగిన ఆల్‌ ఇండియా విహార్‌ సేవా గ్రూప్‌ 14వ సమావేశంలో ఆయన మాట్లాడుతూ.. అభివృద్ధి-పర్యావరణ పరిరక్షణ, వ్యక్తిగత స్వేచ్ఛ-కుటుంబ జీవనం, మత విశ్వాసాలు-సంఘర్షణల మధ్య సమతుల్యత సాధించడంలో ప్రపంచం సవాళ్లు ఎదుర్కొంటోందని పేర్కొన్నారు.

భారత్‌కు చెందిన వేదాలు, ఉపనిషత్తులు, రామాయణం, మహాభారతం, భగవద్గీత, జైన ఆగమాలు, త్రిపిటక, గురు గ్రంథ్‌ సాహిబ్‌, సాధువుల బోధనలు వంటి జ్ఞాన సంప్రదాయాలు ప్రస్తుత ప్రపంచానికి ఉపయోగపడగలవని భాగవత్‌ అన్నారు. భారత్‌ ఇతర దేశాలను ఆక్రమించకుండా, ప్రజలను మతమార్పిడికి గురిచేయకుండా తన జ్ఞానాన్ని పంచుకుందని పేర్కొన్నారు. దేశం, ధర్మం పరస్పరం అనుసంధానమై ఉన్నాయని, ఈ రెండింటినీ ముందుకు తీసుకెళ్లడం బాధ్యత అని తెలిపారు.