‘సిగ్మా’ చుట్టూ ట్వీట్‌ వార్‌.. సందీప్‌ కిషన్‌ కామెంట్స్‌ వైరల్‌

టాలీవుడ్‌లో సినిమాల కంటే వాటి చుట్టూ జరిగే సోషల్‌ మీడియా చర్చలు కూడా హాట్‌టాపిక్‌గా మారుతున్నాయి. తాజాగా హీరో సందీప్‌ కిషన్‌ నటించిన ‘సిగ్మా’ మూవీ చుట్టూ అలాంటి చర్చే మొదలైంది. జాసన్‌ సంజయ్‌ దర్శకత్వంలో తెరకెక్కిన ఈ చిత్రం అక్టోబర్‌ 2న ప్రేక్షకుల ముందుకు వచ్చింది. అయితే విడుదలకు ముందు సందీప్‌ కిషన్‌ చేసిన ఓ ట్వీట్‌ చర్చనీయాంశంగా మారింది. తన సినిమాను లక్ష్యంగా చేసుకుని కొంతకాలంగా ఉద్దేశపూర్వకంగా ప్రతికూల ట్వీట్లు చేస్తున్నారని ఆయన అసహనం వ్యక్తం చేశారు. ఈ ప్రచారం వెనుక ఎవరున్నారో, ఇందుకోసం ఎవరు డబ్బులు ఖర్చు చేస్తున్నారో తనకు తెలుసంటూ హెచ్చరికలు చేయడంతో అసలు ఆయన ఎవరిని ఉద్దేశించి ఈ వ్యాఖ్యలు చేశారనే చర్చ మొదలైంది. అయితే సందీప్‌ తన ట్వీట్‌లో ఎవరిపేరునూ ప్రస్తావించలేదు.

మరోవైపు ఓ సినీ విమర్శకుడి పేరుతో వైరల్‌ అవుతున్న మరో ట్వీట్‌ కూడా చర్చకు దారితీసింది. డిజిటల్‌ మాధ్యమంలో తప్పుడు ప్రచారం జరుగుతోందంటూ అందులో పేర్కొనడంతో కొందరు దాన్ని ‘సిగ్మా’ వివాదంతో ముడిపెడుతున్నారు. అయితే ఆ వ్యాఖ్యలు నేరుగా సందీప్‌ కిషన్‌ను ఉద్దేశించినవేనని స్పష్టత లేదు. ఇదిలా ఉంటే సినిమా విడుదలైన తర్వాత ప్రేక్షకుల నుంచి వస్తున్న స్పందనలో సానుకూల అభిప్రాయాలు కూడా కనిపిస్తున్నాయి. ముఖ్యంగా ఫస్ట్‌హాఫ్‌, ఇంటర్వెల్‌ ఎపిసోడ్‌, సందీప్‌ కిషన్‌ నటనకు ప్రశంసలు వస్తున్నాయి. ఎస్‌. థమన్‌ నేపథ్య సంగీతం యాక్షన్‌ సన్నివేశాలను మరింత ఎలివేట్‌ చేసిందనే కామెంట్లు వినిపిస్తున్నాయి. దీంతో విడుదలకు ముందు మొదలైన ట్వీట్‌ వార్‌ చర్చకు తోడు, సినిమాకు వస్తున్న స్పందన ‘సిగ్మా’పై ఆసక్తిని పెంచుతోంది.