ఉదయాన్నే నిద్ర లేవలేకపోవడానికి అసలు కారణాలు ఇవే

ఉదయాన్నే నిద్ర లేవడం చాలా మందికి కష్టంగా మారుతోంది. ఇది కేవలం అలవాట్ల వల్లే కాదు, శరీరంలోని సహజ ప్రక్రియలు కూడా దీనిపై ప్రభావం చూపుతాయని నిపుణులు చెబుతున్నారు.

మన శరీరంలో నిద్ర–మేల్కొలుపు వ్యవస్థను పూర్తిగా నియంత్రించే జీవగడియారం (బయోలాజికల్ క్లాక్) మెదడులోని హైపోథలామస్‌లో ఉంటుంది. అందులో ఉన్న సుప్రాకయాస్మాటిక్ న్యూక్లియస్ అనే నాడీ కణాల సమూహం వెలుతురు, ఉష్ణోగ్రత, హార్మోన్‌ల వంటి సంకేతాల ఆధారంగా ఎప్పుడు నిద్రపోవాలి? ఎప్పుడు మేల్కొనాలి? అన్నది నిర్ణయిస్తుంది.

యువతలో ఎందుకు ఎక్కువగా కనిపిస్తుంది?

టీనేజర్‌లు, యువతలో జీవగడియారం సహజంగానే ఆలస్యంగా పనిచేస్తుంది. అందుకే రాత్రి ఆలస్యంగా నిద్రపోవడం, ఉదయం ఆలస్యంగా లేవడం సాధారణంగా మారుతుంది.

అడినోసిన్ పాత్ర

రోజంతా మెదడులో పేరుకునే అడినోసిన్ అనే రసాయనం రాత్రి కావడం తో నిద్రను ప్రేరేపిస్తుంది. కానీ ఉదయం వచ్చే సరికి అది పూర్తిగా తగ్గకపోతే, మేల్కొన్న తర్వాత కూడా నిద్ర మత్తు పూర్తిగా పోదు.

మొబైల్, లాప్‌టాప్‌లు ఎందుకు సమస్య?

రాత్రి వేళ ఫోన్, లాప్‌టాప్‌ల నుంచి వెలువడే కృత్రిమ నీలి కాంతి మెలటోనిన్ హార్మోన్ ఉత్పత్తిని తగ్గిస్తుంది. మెలటోనిన్ తగ్గితే నిద్ర వచ్చే సమయం ఇంకా ఆలస్యమవుతుంది.
ఇది జీవగడియారాన్ని పూర్తిగా తప్పుదోవ పట్టిస్తుంది.
దీంతో మరుసటి రోజు ఉదయం నిద్ర లేవడం మరింత కష్టమవుతుంది.