క్రేజీ కాంబోతో చందూ మొండేటి దూకుడు?

తండేల్’తో నాగచైతన్యకు కెరీర్ బిగ్గెస్ట్ హిట్ అందించిన దర్శకుడు చందూ మొండేటి, ఇప్పుడు బాలీవుడ్‌లో తన అదృష్టాన్ని పరీక్షించుకోబోతున్నారట. దిగ్గజ దర్శకుడు సంజయ్ లీలా భన్సాలీ నిర్మిస్తున్న ‘మహాకాళ్’తో హిందీ చిత్రసీమలో దర్శకుడిగా పరిచయం కానున్నట్లు సమాచారం. ‘కార్తికేయ 2’లో చందూ చూపించిన ప్రతిభను మెచ్చిన భన్సాలీ, ఈ పౌరాణిక డ్రామా బాధ్యతలను ఆయనకు అప్పగించినట్లు తెలుస్తోంది.

ఈ సినిమాలో దగ్గుబాటి రానా, బాలీవుడ్ స్టార్ అక్షయ్ కుమార్ కీలక పాత్రల్లో కనిపించనున్నారని సమాచారం. షూటింగ్‌లో ఎక్కువ భాగం వారణాసి నేపథ్యంలో సాగనుండగా, భారీ బడ్జెట్‌తో విజువల్ వండర్‌గా రూపొందించేందుకు సన్నాహాలు చేస్తున్నారట. చందూ మొండేటి ఆలోచనలు నచ్చడంతో కథలో కొన్ని ముఖ్యమైన మార్పులు కూడా చేసినట్లు ప్రచారం జరుగుతోంది. సంజయ్ లీలా భన్సాలీ నిర్మాణం, చందూ మొండేటి దర్శకత్వం కలిసిన ఈ ప్రాజెక్ట్‌పై ప్రేక్షకుల్లో ఆసక్తి పెరుగుతోంది. త్వరలోనే దీనిపై అధికారిక ప్రకటన వచ్చే అవకాశముంది.