

ప్రముఖ AI సంస్థ Anthropic తన AI అసిస్టెంట్ Claudeలో ‘Claude Meetings’ పేరుతో కొత్త ఫీచర్ను పరిచయం చేసింది. దీని ద్వారా వీడియో సమావేశాల్లో Claude కూడా పాల్గొని, చర్చలు జరుగుతున్నప్పుడే నోట్స్ తీసుకోవడం, ప్రశ్నలకు సమాధానాలు ఇవ్వడం, డాక్యుమెంట్లు రూపొందించడం వంటి పనులు చేయగలదు. నవంబర్ 12, 2026న ప్రకటించిన ఈ ఫీచర్ను ప్రస్తుతం Claude Team, Enterprise వినియోగదారులకు బీటా వెర్షన్లో అందుబాటులోకి తెస్తోంది. ప్రస్తుతానికి Google Meetకు మద్దతు ఇస్తుండగా, భవిష్యత్తులో మరిన్ని వీడియో కాన్ఫరెన్సింగ్ ప్లాట్ఫామ్లకు విస్తరించనుంది. సాధారణంగా సమావేశం ముగిసిన తర్వాత సారాంశాన్ని అందించే AI టూల్స్కు భిన్నంగా, Claude Meetings చర్చలు కొనసాగుతున్న సమయంలోనే పనులు పూర్తి చేయగలదు. వాయిస్ లేదా మీటింగ్ చాట్ ద్వారా సూచనలు ఇస్తే ప్రాజెక్ట్ డాక్యుమెంట్లు తయారు చేయడం, పనుల జాబితాను క్రమబద్ధీకరించడం, వైట్బోర్డులు రూపొందించడం, చర్చల్లో వచ్చే మార్పులకు అనుగుణంగా సమాచారాన్ని అప్డేట్ చేయడం వంటి సేవలను అందిస్తుంది. సమావేశం ముగిసిన తర్వాత నోట్స్, ట్రాన్స్క్రిప్ట్, రూపొందించిన డాక్యుమెంట్లను ప్రత్యేక మీటింగ్ పేజీలో చూడవచ్చు.
Claude సమావేశంలో కనిపించే పార్టిసిపెంట్గా చేరుతుందని, తాను ఉన్న విషయాన్ని ఇతరులకు తెలియజేస్తుందని Anthropic తెలిపింది. సమావేశాల ట్రాన్స్క్రిప్ట్లు, సారాంశాలు, షేర్ చేసిన స్క్రీన్ల వివరణలను భద్రపరుస్తుంది కానీ ఆడియో రికార్డింగ్లను సేవ్ చేయదని స్పష్టం చేసింది. వినియోగదారులు అనుమతి ఇస్తే కనెక్ట్ చేసిన వర్క్ప్లేస్ టూల్స్ను కూడా ఉపయోగించగలదు. ట్రాన్స్క్రిప్షన్ ప్రారంభించే ముందు సమావేశంలో పాల్గొనే వారి సమ్మతి తీసుకోవాలని సంస్థ సూచించింది. బీటా దశలో నోట్స్, ట్రాన్స్క్రిప్ట్లు, కనెక్ట్ చేసిన టూల్స్ అవసరం లేని సమాధానాలు అందుబాటులో ఉంటాయి. సమావేశాల్లో రూపొందించే డాక్యుమెంట్లు, వైట్బోర్డులు 2027 ఫిబ్రవరి 10 వరకు ఉచితంగా లభిస్తాయి. కనెక్ట్ చేసిన టూల్స్ వినియోగం మాత్రం సంస్థ ప్లాన్ పరిమితులకు లోబడి ఉండవచ్చు. ఈ కొత్త ఫీచర్తో AI మీటింగ్ అసిస్టెంట్ రంగంలో పోటీ మరింత పెరగనుంది. ఇప్పటికే ఈ విభాగంలో సేవలందిస్తున్న Fireflies.ai, Otter, Granola వంటి సంస్థలతో Anthropic ఇంటిగ్రేషన్లపై పనిచేస్తోంది. సమావేశాల తర్వాత సారాంశాలు అందించడానికే పరిమితం కాకుండా, చర్చలు జరుగుతున్నప్పుడే పనులను పూర్తి చేసే దిశగా వర్క్ప్లేస్ AI అభివృద్ధి చెందుతోందని ఈ పరిణామం సూచిస్తోంది.




కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!