

తెలంగాణ ఉద్యమంలో చురుకుగా పాల్గొన్న కళాకారులు మధుప్రియ, శివజ్యోతిపై ఓ ప్రవాస భారతీయుడు చేసినట్లు ఆరోపణలు వస్తున్న అనుచిత వ్యాఖ్యలను మాజీ మంత్రి, BRS నాయకురాలు సబితా ఇంద్రారెడ్డి తీవ్రంగా ఖండించారు. ఈ వ్యవహారంపై రాష్ట్ర ప్రభుత్వం, తెలంగాణ మహిళా కమిషన్ తక్షణమే సుమోటోగా స్పందించి కేసు నమోదు చేయడంతో పాటు బాధ్యులపై కఠిన చర్యలు తీసుకోవాలని డిమాండ్ చేశారు. ప్రభుత్వాన్ని విమర్శించిన, ముఖ్యమంత్రి వైఖరిని ప్రశ్నించిన మహిళా జర్నలిస్టులపై చర్యలు తీసుకోవడంలో చూపిన వేగం.. మహిళలను కించపరుస్తూ దుర్భాషలాడుతున్న వారిపై చర్యలు తీసుకోవడంలో ఎందుకు కనిపించడం లేదని ప్రశ్నించారు.
హైదరాబాద్లోని వ్యవసాయ విశ్వవిద్యాలయంలో ఓ మహిళా ప్రొఫెసర్ వైస్ ఛాన్స్లర్ తనను దుర్భాషలాడినట్లు ఆరోపించిన ఘటనతో పాటు, పనుల కోసం వచ్చిన ఓ మహిళను కాంగ్రెస్ నాయకుడు లైంగికంగా వేధించినట్లు వచ్చిన ఆరోపణలను కూడా సబితా ఇంద్రారెడ్డి ప్రస్తావించారు. ఈ వ్యవహారాల్లో ఇప్పటివరకు చర్యలు తీసుకోకపోవడం ప్రభుత్వ ద్వంద్వ వైఖరికి నిదర్శనమని విమర్శించారు. మహిళల ఆత్మగౌరవాన్ని దెబ్బతీసే వారిని ఉపేక్షించకూడదని, బాధిత మహిళలకు తక్షణ న్యాయం జరిగేలా ప్రభుత్వం స్పందించి బాధ్యులపై చర్యలు తీసుకోవాలని ఆమె డిమాండ్ చేశారు.


కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!