

పాకిస్థాన్ మాజీ ప్రధాని ఇమ్రాన్ ఖాన్ తన ఆరోగ్యం రోజురోజుకూ క్షీణిస్తోందని, జైలు నుంచి ప్రాణాలతో బయటకు వస్తానో లేదోనని ఆందోళన వ్యక్తం చేశారు. తనకు, తన భార్య బుష్రా బీబీకి సరైన వైద్య చికిత్స అందేలా చూడాలని పాకిస్థాన్ సుప్రీంకోర్టు, ఇస్లామాబాద్ హైకోర్టు ప్రధాన న్యాయమూర్తులకు లేఖ ద్వారా విజ్ఞప్తి చేశారు. ప్రస్తుతం జైలులో ఉన్న ఆయన రాసిన ఈ లేఖను న్యాయవాది సోషల్ మీడియా వేదిక ‘ఎక్స్’లో వెల్లడించారు. వైద్య చికిత్స, జైలులో కల్పించాల్సిన సౌకర్యాలపై గతంలో న్యాయస్థానాలు ఇచ్చిన ఆదేశాలను అమలు చేయాలని కోరారు. తనను రోజుకు సుమారు 22 గంటల పాటు ఏకాంత నిర్బంధంలో ఉంచుతున్నారని, ఇతర ఖైదీలు, కుటుంబ సభ్యులు, న్యాయవాదులతో మాట్లాడేందుకు అనుమతించడం లేదని ఆరోపించారు. కుమారులతో ఫోన్లో మాట్లాడే అవకాశం కూడా ఇవ్వడం లేదని, పుస్తకాలు, టీవీ సౌకర్యాలను సైతం నిలిపివేశారని పేర్కొన్నారు. దీర్ఘకాలిక ఏకాంత నిర్బంధం, వైద్య సంరక్షణ లోపం కారణంగా తన ఆరోగ్యం తీవ్రంగా దెబ్బతింటోందని ఆవేదన వ్యక్తం చేశారు.
మరోవైపు, తన భార్య బుష్రా బీబీ కంటిచూపు కూడా క్షీణిస్తోందని, శస్త్రచికిత్స చేయకపోతే ఆమె శాశ్వతంగా చూపు కోల్పోయే ప్రమాదం ఉందని ఇమ్రాన్ ఖాన్ ఆందోళన వ్యక్తం చేశారు. తనను ఇస్లామాబాద్లోని షిఫా ఆసుపత్రికి తరలించాలని, కుటుంబ సభ్యులతో వారానికోసారి సమావేశం కావడానికి, కుమారులతో వారానికి రెండుసార్లు ఫోన్లో మాట్లాడేందుకు ఆగస్టు 18న సుప్రీంకోర్టు ఆదేశాలు ఇచ్చిన విషయాన్ని గుర్తుచేశారు. అయితే అధికారులు వాటిని అమలు చేయడం లేదని ఆరోపించారు. అప్పటి నుంచి తన ఆరోగ్యం మరింత క్షీణించిందని, ఇటీవల రక్తపోటు భారీగా పెరగడంతో మెదడులో రక్తస్రావం లేదా గుండెపోటు వచ్చే ప్రమాదం ఉందని వైద్యులు హెచ్చరించినట్లు తెలిపారు. తాను బతికి ఉంటేనే నిర్దోషిత్వాన్ని నిరూపించుకోగలనని పేర్కొంటూ, ఆలస్యం కాకముందే మానవతా దృక్పథంతో స్పందించి తనకు, తన భార్యకు తక్షణ వైద్య సహాయం అందేలా చూడాలని న్యాయస్థానాలను అభ్యర్థించారు.




కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!