యుద్ధం పై ట్రంప్ కీలక ప్రకటన

పశ్చిమాసియాలో కొనసాగుతున్న యుద్ధ పరిణామాల మధ్య అమెరికా అధ్యక్షుడు డొనాల్డ్ ట్రంప్ ఇరాన్‌పై జరుగుతున్న సైనిక చర్యలపై కీలక ప్రకటన చేశారు. తాము ఇరాన్ నుంచి త్వరలోనే వైదొలగనున్నామని, ఇది రెండు నుంచి మూడు వారాల్లో జరిగే అవకాశముందని తెలిపారు. వైట్ హౌస్‌లో మీడియాతో మాట్లాడిన ఆయన, ఈ నిర్ణయం ఇరాన్‌తో ఒప్పందం కుదుర్చుకోవడంపై ఆధారపడి లేదని స్పష్టం చేశారు.

ఇరాన్ అణు సామర్థ్యం గణనీయంగా తగ్గిందని భావించిన తర్వాతే ఈ నిర్ణయం తీసుకుంటామని ట్రంప్ పేర్కొన్నారు. ఇజ్రాయెల్‌తో కలిసి చేసిన దాడుల వల్ల ఇరాన్ సైనిక శక్తి తీవ్రంగా దెబ్బతిన్నదని, ఆ దేశం కోలుకోవడానికి చాలా కాలం పడుతుందని తెలిపారు. ప్రస్తుత పరిస్థితుల్లో ఇరాన్ నాయకత్వం కూడా బలహీనంగా ఉందని వ్యాఖ్యానించారు.