మెట్రో, ఆర్ టీ సీ కామన్ పాస్ లాంచ్ చేసిన డిప్యూటీ సీఎం, మంత్రులు

తెలంగాణ ప్రభుత్వం హైదరాబాద్ ప్రజా రవాణా వ్యవస్థలో కీలక మార్పులకు శ్రీకారం చుట్టింది. హైదరాబాద్ మెట్రో, టీజీఎస్‌ఆర్టీసీ సిటీ బస్సులను అనుసంధానించే కామన్ ట్రావెల్ పాస్‌తో పాటు ‘MeeTicket’ మొబైల్ యాప్, డిజిటల్ వీక్లీ బస్ పాస్‌ను అందుబాటులోకి తీసుకొచ్చింది. శుక్రవారం హైదరాబాద్ ప్రజాభవన్‌లో జరిగిన కార్యక్రమంలో ఉప ముఖ్యమంత్రి మల్లు భట్టి విక్రమార్క ఈ సేవలను ప్రారంభించారు. మెట్రోతో పాటు ఆర్టీసీ బస్సులను వినియోగించే ప్రయాణికులకు, ముఖ్యంగా ఫస్ట్ మైల్, లాస్ట్ మైల్ కనెక్టివిటీకి ఈ విధానం ఉపయోగపడేలా రూపొందించారు.

రోజువారీ కామన్ పాస్ ధర రూ.400గా నిర్ణయించారు. ఇందులో మెట్రోకు రూ.300, ఆర్టీసీకి రూ.100 చొప్పున కేటాయించారు. నెలవారీ కామన్ పాస్ ధర రూ.8,500 కాగా, ఇందులో మెట్రోకు రూ.7,000, ఆర్టీసీకి రూ.1,500గా ఉంది. మొదటిసారి కార్డు తీసుకునే సమయంలో రూ.100 సెక్యూరిటీ డిపాజిట్ చెల్లించాలి. కార్డును తిరిగి అప్పగించినప్పుడు ఈ మొత్తాన్ని రీఫండ్ చేస్తారు. ఈ పాస్‌ను ORR పరిధిలోని అర్హత కలిగిన టీజీఎస్‌ఆర్టీసీ సిటీ బస్సుల్లో, పుష్పక్ సేవలను మినహాయించి, అలాగే హైదరాబాద్ మెట్రోలో ఉపయోగించుకోవచ్చు.

ఇక సిటీ బస్ ప్రయాణికుల కోసం ‘MeeTicket’ యాప్‌ను కూడా ప్రారంభించారు. ఈ యాప్ ద్వారా ప్రయాణికులు తమ మొబైల్‌లోనే బస్ టికెట్లు, డిజిటల్ పాస్‌లు కొనుగోలు చేయవచ్చు. బోర్డింగ్ పాయింట్, గమ్యస్థానం, టికెట్ రకాన్ని ఎంచుకుని ఆన్‌లైన్‌లో చెల్లింపు చేసిన తర్వాత డైనమిక్ QR కోడ్‌తో డిజిటల్ టికెట్ పొందవచ్చు. రోజువారీ, వారపు, నెలవారీ పాస్‌లను కూడా యాప్ ద్వారా పొందే అవకాశం ఉంది. రూ.600తో డిజిటల్ వీక్లీ బస్ పాస్‌ను అందుబాటులోకి తీసుకొచ్చారు.

కామన్ పాస్ విధానాన్ని ప్రజలకు మరింత చేరువ చేసేందుకు ఉప ముఖ్యమంత్రి భట్టి విక్రమార్క మంత్రుల కోసం డైలీ కామన్ పాస్‌లను కొనుగోలు చేశారు. రవాణా శాఖ మంత్రి పొన్నం ప్రభాకర్ తెలిపిన వివరాల ప్రకారం.. భట్టి విక్రమార్కతో పాటు ఇతర మంత్రులు కామన్ పాస్‌తో మెట్రో, ఆర్టీసీ బస్సుల్లో ప్రయాణించనున్నారు. బేగంపేట మెట్రో స్టేషన్ నుంచి మెట్రోలో ప్రయాణించి, అనంతరం ఆర్టీసీ బస్సులో ప్రయాణించనున్నట్లు తెలిపారు. ప్రజా రవాణా వ్యవస్థల మధ్య సమన్వయాన్ని పెంచడం, ప్రయాణికులకు సులభమైన కనెక్టివిటీ అందించడం ఈ కొత్త విధానం లక్ష్యంగా ప్రభుత్వం పేర్కొంది.