రెండేళ్లు భరించండి.. కేసీఆర్‌ తిరిగి వస్తారు: కేటీఆర్‌

కార్మికులు కొంతకాలం సహనం పాటించాలని, భవిష్యత్తులో కేసీఆర్‌ తిరిగి వచ్చి వారికి మేలు చేస్తారని బీఆర్‌ఎస్‌ కార్యనిర్వాహక అధ్యక్షుడు కేటీఆర్‌ అన్నారు. హైదరాబాద్‌లో నిర్వహించిన మేడే వేడుకల్లో మాట్లాడుతూ, కొవిడ్‌ సమయంలో కార్మికులను తమ ప్రభుత్వం ఎంతో జాగ్రత్తగా చూసుకుందని గుర్తుచేశారు. ఇతర రాష్ట్రాల కార్మికుల కోసం ఉచిత రైళ్లు ఏర్పాటు చేసినట్లు తెలిపారు.

లాక్‌డౌన్‌ సమయంలో అభివృద్ధి పనులు ఆగకుండా రోడ్లు, వంతెనల నిర్మాణం కొనసాగించామని కేటీఆర్‌ చెప్పారు. కార్మికుల సహకారంతోనే ఈ పనులు పూర్తయ్యాయని, వారికి తాము కృతజ్ఞతలు తెలియజేస్తున్నామని అన్నారు. తెలంగాణ అభివృద్ధిపై తమకు ఉన్న నిబద్ధత వల్లే ఆ కష్టకాలంలో కూడా పనులు ఆపలేదని వివరించారు.

ప్రస్తుత రాష్ట్ర ప్రభుత్వంపై కేటీఆర్‌ విమర్శలు గుప్పించారు. కార్మికుల సమస్యలను పట్టించుకోవడం లేదని ఆరోపించారు. గ్యాస్‌ ధరలు తగ్గించాలని కేంద్రాన్ని కోరుతూ, రాష్ట్రంలో కార్మిక వ్యతిరేక పరిస్థితులు నెలకొన్నాయని అన్నారు. ఆటో డ్రైవర్ల ఆత్మహత్యలపై ప్రభుత్వం స్పందించలేదని విమర్శిస్తూ, కార్మికులు రెండేళ్లు సహనం పాటిస్తే పరిస్థితులు మారుతాయని వ్యాఖ్యానించారు.