యూపీఐ చెల్లింపులపై ఎండీఆర్‌ విధిస్తే నగదు వైపు మళ్లనున్న చిన్న వ్యాపారులు

రూ.2,000కు మించిన యూపీఐ వాణిజ్య లావాదేవీలపై మర్చంట్‌ డిస్కౌంట్‌ రేట్‌ (ఎండీఆర్‌) విధిస్తే చిన్న వ్యాపారులు తిరిగి నగదు చెల్లింపుల వైపు మళ్లే ప్రమాదం ఉందని ఇండియన్‌ స్కూల్‌ ఆఫ్‌ బిజినెస్‌ (ఐఎస్‌బీ) అధ్యయనం వెల్లడించింది. వినియోగదారుల నుంచి రూ.2,000లోపు చెల్లింపులు స్వీకరించే చిన్న వ్యాపారులకు ఎండీఆర్‌ నుంచి మినహాయింపు ఉన్నప్పటికీ, వారు సరఫరాదారులకు చేసే చెల్లింపులు రూ.2,000 దాటితే 0.4 శాతం ఛార్జీ భరించాల్సి రావొచ్చని నివేదిక పేర్కొంది. ఈ భారాన్ని వ్యాపారులపైకి బదిలీ చేసే అవకాశం ఉందని తెలిపింది. ఎండీఆర్‌ అమల్లోకి వస్తే యూపీఐ ద్వారా చెల్లింపులు స్వీకరించడం తగ్గిస్తామని పెద్ద నగరాల్లో 53 శాతం, చిన్న నగరాల్లో 45 శాతం మంది వ్యాపారులు వెల్లడించినట్లు అధ్యయనం తెలిపింది. ఐఎస్‌బీకి చెందిన సెంటర్‌ ఫర్‌ అనలిటికల్‌ ఫైనాన్స్‌ 14 రాష్ట్రాలు, కేంద్రపాలిత ప్రాంతాల్లోని 64 పట్టణాల్లో 722 మంది వీధి వ్యాపారుల అభిప్రాయాలను సేకరించింది. వీరిలో 67 శాతం మంది యూపీఐ చెల్లింపులు స్వీకరిస్తుండగా, 52 శాతం మందికే ఎండీఆర్‌పై అవగాహన ఉంది.

ఎండీఆర్‌ భారం వినియోగదారులపై పడే అవకాశం

నెలకు రూ.లక్ష వరకు యూపీఐ చెల్లింపులు స్వీకరించే చిన్న వ్యాపారులకు మాత్రమే ఎండీఆర్‌ నుంచి మినహాయింపు ఇవ్వాలన్న ప్రతిపాదన ఉంది. అయితే తమపై ఎండీఆర్‌ భారం పడితే ఆ మొత్తాన్ని వినియోగదారుల నుంచి వసూలు చేస్తామని పెద్ద నగరాల్లో 30 శాతం, రెండో శ్రేణి పట్టణాల్లో 14 శాతం, మూడో శ్రేణి పట్టణాల్లో 19 శాతం మంది వ్యాపారులు తెలిపారు. మరికొందరు నగదు చెల్లింపులనే కోరతామని వెల్లడించారు. పెద్ద నగరాల్లో 82 శాతం, రెండో శ్రేణి పట్టణాల్లో 66 శాతం, మూడో శ్రేణి పట్టణాల్లో 64 శాతం మంది వ్యాపారులు ఇప్పటికే యూపీఐ చెల్లింపులను స్వీకరిస్తున్నారు. డిజిటల్‌ లావాదేవీల నుంచి చిన్న వ్యాపారులు దూరమైతే బ్యాంకు రుణాలు పొందే అవకాశాలపైనా ప్రభావం పడవచ్చని ఐఎస్‌బీ నివేదిక హెచ్చరించింది. అందువల్ల ఎండీఆర్‌ను అమలు చేయడానికి ముందు పరిమిత స్థాయిలో ప్రయోగాత్మకంగా పరిశీలించాలని సూచించింది. సరఫరాదారులు, వినియోగదారులపై పడే భారం, నగదు లావాదేవీల్లో వచ్చే మార్పులను అధ్యయనం చేసిన తర్వాతే ఛార్జీల భారాన్ని ఎలా పంపిణీ చేయాలనే దానిపై నిర్ణయం తీసుకోవాలని పేర్కొంది.