ఏపీలో పరిషత్‌ ఎన్నికల సమరం.. భారీ భద్రత మధ్య కొనసాగుతున్న పోలింగ్‌

ఆంధ్రప్రదేశ్‌లో ఎంపీటీసీ, జెడ్పీటీసీ ఎన్నికల పోలింగ్‌ కొనసాగుతోంది. ఉదయం 7 గంటలకు ప్రారంభమైన పోలింగ్‌ సాయంత్రం 5 గంటల వరకు జరగనుంది. అయితే కొన్ని ఏజెన్సీ ప్రాంతాల్లో మధ్యాహ్నం 3 గంటలకే పోలింగ్‌ ముగియనుంది. రాష్ట్రవ్యాప్తంగా 7,767 ఎంపీటీసీ, 582 జెడ్పీటీసీ స్థానాలకు ఎన్నికలు నిర్వహిస్తున్నారు. మొత్తం 21,012 మంది అభ్యర్థులు బరిలో నిలిచారు. ఈ ఎన్నికల్లో 2,61,52,377 మంది ఓటర్లు తమ ఓటు హక్కును వినియోగించుకోనున్నారు. ఇందుకోసం రాష్ట్రవ్యాప్తంగా 31,460 పోలింగ్‌ కేంద్రాలను ఏర్పాటు చేశారు.

ఎన్నికల నిర్వహణ కోసం 40,679 మంది పోలీసు సిబ్బంది, 1,90,322 మంది పోలింగ్‌ సిబ్బందిని నియమించారు. రాష్ట్రవ్యాప్తంగా 8,904 సమస్యాత్మక, 7,160 అత్యంత సమస్యాత్మక పోలింగ్‌ కేంద్రాలను గుర్తించి భద్రతను కట్టుదిట్టం చేశారు. నవంబర్‌ 7న ఉదయం 8 గంటల నుంచి ఓట్ల లెక్కింపు ప్రారంభం కానుంది. మరోవైపు భారీ వర్షాలు, ప్రతికూల వాతావరణ పరిస్థితుల నేపథ్యంలో గుంటూరు జిల్లాలోని పెదనందిపాడు, ఫిరంగిపురం, కాకుమాను మండలాల్లో ఎన్నికలను తాత్కాలికంగా వాయిదా వేశారు.