కోహ్లీ మెరుపు ఇన్నింగ్స్‌.. రోహిత్‌ రనౌట్‌పై గిల్‌ ఆసక్తికర వ్యాఖ్యలు

న్యూజిలాండ్‌తో జరిగిన తొలి వన్డేలో టీమిండియా ఐదు వికెట్ల తేడాతో విజయం సాధించి సిరీస్‌లో ఆధిక్యంలో నిలిచింది. వర్షం కారణంగా భారత్‌ లక్ష్యాన్ని 167 పరుగులకు కుదించగా, విరాట్‌ కోహ్లీ 51 బంతుల్లో 74 పరుగులు చేసి జట్టు విజయంలో కీలక పాత్ర పోషించాడు. మధ్యలో మిడిలార్డర్‌ వికెట్లు కోల్పోయి కొంత ఒత్తిడికి గురైనప్పటికీ, భారత బ్యాటర్లు లక్ష్యాన్ని 22.4 ఓవర్లలోనే ఛేదించారు. మ్యాచ్‌ అనంతరం కెప్టెన్‌ శుభ్‌మన్‌ గిల్‌ జట్టు ప్రదర్శనపై సంతృప్తి వ్యక్తం చేశాడు. బౌలింగ్‌, ఫీల్డింగ్‌ విభాగాల్లో ఆటగాళ్లు అద్భుతంగా రాణించారని ప్రశంసించాడు. విరాట్‌ కోహ్లీ బ్యాటింగ్‌ ఛేజింగ్‌ను సులభతరం చేసిందని పేర్కొన్నాడు. రోహిత్‌ శర్మ చేసిన రనౌట్‌ మ్యాచ్‌లో కీలక మలుపుగా నిలిచిందని, దాంతో మ్యాచ్‌ తమ వైపు తిరిగిందని గిల్‌ అభిప్రాయపడ్డాడు.

న్యూజిలాండ్‌ బ్యాటర్లు మిచెల్‌, గ్లెన్‌ ఫిలిప్స్‌ నెలకొల్పిన భాగస్వామ్యం తమను కొంత ఇబ్బంది పెట్టిందని గిల్‌ చెప్పాడు. యువ పేసర్లు అన్షుల్‌ కంబోజ్‌, గుర్నూర్‌ బ్రార్‌ ప్రదర్శనను ప్రత్యేకంగా ప్రశంసించాడు. ఈ పరిస్థితుల్లో అన్షుల్‌ సీమ్‌ బౌలింగ్‌, పాత బంతితో రాణించే సామర్థ్యం జట్టుకు ఉపయోగపడిందని తెలిపాడు. పిచ్‌ నుంచి పెద్దగా సహకారం లేని సమయంలోనూ గుర్నూర్‌ తన వేగం, అదనపు బౌన్స్‌తో ప్రభావం చూపించాడని పేర్కొన్నాడు. వర్షం తర్వాత పిచ్‌ మరింత వేగంగా మారిందని, లక్ష్యం తక్కువగా ఉండటంతో ఒత్తిడికి లోనుకాకుండా సాధారణ ఆటతీరుతో ఛేదన కొనసాగించామని వివరించాడు. రాబోయే వెల్లింగ్టన్‌ మ్యాచ్‌లోనూ ఇదే స్థిరమైన ప్రదర్శనను కొనసాగిస్తామని గిల్‌ ధీమా వ్యక్తం చేశాడు.