ఏఐ వాడకంలో డేటా భద్రతపై ముప్పు

మైక్రోసాఫ్ట్ సీఈఓ సత్య నాదెళ్ల ఏఐ సాంకేతికత వినియోగంపై కీలక హెచ్చరిక చేశారు. వ్యాపార సంస్థలు శక్తివంతమైన ఏఐ మోడళ్ల సేవలు పొందడానికి భారీగా ఖర్చు చేస్తూనే, తమ సొంత విలువైన సమాచారాన్ని వాటికి అందిస్తున్నాయని తెలిపారు. ఈ సమస్యను ఆయన ‘రివర్స్ ఇన్ఫర్మేషన్ పారడాక్స్’గా అభివర్ణిస్తూ, వినియోగదారులు తమ సమాచారాన్ని వెల్లడించక తప్పని పరిస్థితి ఏర్పడుతోందని చెప్పారు.

ఏఐ మోడళ్లు వినియోగదారుల ప్రాంప్ట్‌లు, సవరణలు, టూల్స్ ద్వారా నిరంతరం నేర్చుకుంటూ తమ మేధను పెంచుకుంటున్నాయని, అయితే ఆ డేటా వినియోగంపై స్పష్టత లేకపోవడం సమస్యగా మారిందన్నారు. సృష్టించిన జ్ఞానంపై యాజమాన్యం వినియోగదారులకే ఉండాలని, సంస్థలు తమ క్లౌడ్ పరిధిలోనే సురక్షిత అభ్యాస వాతావరణాలను నిర్మించుకోవాలని సూచించారు.