భారత్‌లో క్లాడ్ AIకు రూపాయి ధరలు..

ఆంత్రోపిక్ (Anthropic) భారత్‌లో తన క్లాడ్ AI (Claude AI) చాట్‌బాట్ సబ్‌స్క్రిప్షన్‌లకు రూపాయి ధరలను ప్రవేశపెట్టింది. దీంతో భారతీయ వినియోగదారులు ఇకపై అమెరికన్ డాలర్లలో చెల్లించాల్సిన అవసరం లేకుండా, కరెన్సీ మార్పిడి ఛార్జీల నుంచి కూడా ఉపశమనం పొందనున్నారు. కొత్త ధరల ప్రకారం క్లాడ్ ప్రో వార్షిక బిల్లింగ్‌తో నెలకు ₹2,000, క్లాడ్ మ్యాక్స్ ₹11,999, క్లాడ్ టీమ్ ప్లాన్ ఒక్కో వినియోగదారుకు నెలకు ₹2,399 నుంచి ప్రారంభమవుతుంది. ప్రస్తుతం క్రెడిట్, డెబిట్ కార్డులు, యాపిల్, గూగుల్ యాప్ స్టోర్ బిల్లింగ్ ద్వారా చెల్లింపులు చేయవచ్చు. అయితే యూపీఐ (UPI) సదుపాయం ఇంకా అందుబాటులోకి రాలేదు.

భారత్ అమెరికా తర్వాత ఆంత్రోపిక్‌కు అతిపెద్ద మార్కెట్గా మారింది. కంపెనీ గణాంకాల ప్రకారం ప్రపంచవ్యాప్తంగా క్లాడ్ వినియోగంలో 5.8 శాతం భారత్ నుంచే నమోదవుతోంది. ఈ ఏడాది బెంగళూరులో కార్యాలయం ప్రారంభించిన ఆంత్రోపిక్, భారత కార్యకలాపాలకు ఇరీనా ఘోష్ను నియమించింది. అలాగే ఇన్ఫోసిస్, టాటా కన్సల్టెన్సీ సర్వీసెస్ (TCS)తో భాగస్వామ్యాలు కుదుర్చుకుని ఎంటర్‌ప్రైజ్ AI సేవలను విస్తరించే దిశగా అడుగులు వేస్తోంది.