కృత్రిమ మేధస్సుతో కొత్త ఉద్యోగాల డిమాండ్ పెరుగుతోంది

భారత డేటా సెంటర్ మార్కెట్‌లో ఇప్పటికే 126 బిలియన్ డాలర్లకు పైగా పెట్టుబడి హామీలు నమోదవడంతో ఈ రంగం దేశంలో అత్యంత వేగంగా అభివృద్ధి చెందుతున్న మౌలిక సదుపాయాల విభాగాల్లో ఒకటిగా నిలిచింది. అయితే, ఈ వేగవంతమైన వృద్ధికి అనుగుణంగా నైపుణ్యాలు కలిగిన మానవ వనరుల కొరత భవిష్యత్తులో పెద్ద సవాలుగా మారే అవకాశం ఉందని నిపుణులు హెచ్చరిస్తున్నారు. ఎన్‌ఎల్‌బీ సర్వీసెస్ సీఈవో సచిన్ అలుగ్ మాట్లాడుతూ, డేటా సెంటర్లు, ఏఐ మౌలిక సదుపాయాల విస్తరణ యువతకు విస్తృత ఉపాధి అవకాశాలను కల్పించే జాతీయ స్థాయి అవకాశమని తెలిపారు.

డిజిటల్ పరివర్తన వేగంగా జరుగుతున్న నేపథ్యంలో ఏఐ ఇన్‌ఫ్రాస్ట్రక్చర్, క్లౌడ్ ఆపరేషన్స్, ఆటోమేషన్, పవర్ సిస్టమ్స్, క్రిటికల్ ఫెసిలిటీస్ మేనేజ్‌మెంట్ వంటి రంగాల్లో నైపుణ్యం కలిగిన ఉద్యోగుల కోసం భారీ డిమాండ్ ఏర్పడుతోంది. ఏఐ వినియోగం పెరుగుతున్న కొద్దీ ఏఐ ఇన్‌ఫ్రాస్ట్రక్చర్ ఇంజినీరింగ్, డెవ్‌ఓప్స్, ఎంఎల్‌ఓప్స్, డేటా సెంటర్ ఆటోమేషన్ వంటి విభాగాల్లో నిపుణుల అవసరం మరింత పెరుగుతోంది. రాబోయే కాలంలో డేటా సెంటర్ సామర్థ్యంలో సుమారు 30 శాతం ఏఐ వర్క్‌లోడ్లకు కేటాయించే అవకాశముందని నివేదికలు సూచిస్తున్నాయి.