యాపిల్ ఏ ఐ హెడ్ గా ఇండియన్

యాపిల్ సంస్థ కీలక నిర్ణయం తీసుకుంది. కంపెనీ తమ ఆర్టిఫిషియల్ ఇంటెలిజెన్స్ (AI) విభాగానికి భారత సంతతికి చెందిన అమర్ సుబ్రమణ్యను కొత్త చీఫ్‌గా నియమించింది. ఇప్పటివరకు ఈ బాధ్యతలు నిర్వర్తించిన జాన్ జియానాండ్రియా స్థానంలో అమర్ పని చేయనున్నారు.

అమర్ సుబ్రమణ్య యాపిల్ ఫౌండేషన్ ఏఐ మోడల్స్‌, మెషీన్ లెర్నింగ్ పరిశోధన, అలాగే కంపెనీ అభివృద్ధి చేస్తున్న కొత్త AI సామర్థ్యాల పర్యవేక్షణ వంటి కీలక బాధ్యతలను నిర్వర్తించనున్నారు.

AI రంగంలో అమర్‌కు విస్తృత అనుభవం ఉంది. ఇటీవల ఆయన మైక్రోసాఫ్ట్‌లో AI విభాగం వైస్ ప్రెసిడెంట్‌గా పనిచేశారు. అంతకుముందు గూగుల్‌లో సుమారు 16 సంవత్సరాల పాటు సేవలందించి, జెమినీ అసిస్టెంట్ ఇంజనీరింగ్ విభాగానికి నేతృత్వం వహించారు. పరిశ్రమలో ఉన్నత స్థాయి AI ప్రాజెక్టులతో పనిచేసిన ఆయనకు గ్లోబల్‌గా మంచి గుర్తింపు ఉంది.

ఇక జియానాండ్రియా విషయానికి వస్తే — ఆయన వచ్చే ఏడాది రిటైర్ అయ్యే వరకు యాపిల్‌కి సీనియర్ సలహాదారుగా కొనసాగుతారు. యాపిల్ AI ఆధారిత భవిష్యత్ ఉత్పత్తుల అభివృద్ధిలో అమర్ సుబ్రమణ్య కీలక పాత్ర పోషించనున్నారని టెక్ విశ్లేషకులు అభిప్రాయపడుతున్నారు.