చైనా హ్యూమనాయిడ్ రోబోట్ ప్రదర్శనలో చిన్నారి ముఖానికి తాకిన రోబోట్

చైనాలో హ్యూమనాయిడ్ రోబోట్ల అభివృద్ధి వేగంగా కొనసాగుతున్న సమయంలో, ఒక అనుకోని ఘటన సోషల్ మీడియాలో వైరల్ అవుతోంది. ఈ నెల 21న షాన్సీ ప్రావిన్స్‌లో జరిగిన ఓ బహిరంగ నృత్య ప్రదర్శనలో, ఒక హ్యూమనాయిడ్ రోబోట్ ప్రమాదవశాత్తు ఒక చిన్న బాలుడి ముఖాన్ని తాకింది. వెంటనే సిబ్బంది స్పందించి రోబోట్‌ను నియంత్రించేందుకు ప్రయత్నించారు.

ఈ రోబోట్ చైనా టెక్నాలజీ సంస్థ యూనిట్రీ రోబోటిక్స్ తయారు చేసిన జీ1 మోడల్‌గా గుర్తించారు. సుమారు 35 కిలోల బరువున్న ఈ రోబోట్ ధర 13,500 డాలర్లు. దీనిని పరిశోధన, విద్యా మరియు వాణిజ్య అవసరాల కోసం రూపొందించారు. అయితే ఘటన జరిగినప్పటికీ, రోబోట్ తన ప్రోగ్రామ్‌ను కొనసాగించడం గమనార్హం.

ఈ వీడియోపై నెటిజన్లు భిన్నంగా స్పందిస్తున్నారు. ఇలాంటి ప్రదర్శనలు ప్రమాదకరమని కొందరు అభిప్రాయపడగా, రోబోట్లను పూర్తిగా పరీక్షించిన తరువాత మాత్రమే ప్రజల ముందు ఉపయోగించాలని మరికొందరు సూచిస్తున్నారు. గతంలో కూడా రష్యాలో జరిగిన టెక్నాలజీ ఈవెంట్‌లో ఒక రోబోట్ వేదికపై పడిపోవడం వంటి ఘటనలు చోటుచేసుకున్నాయి.