Ipl 2026 తిలక్ వర్మ సెంచరీ తో గుజరాత్ పై ముంబై ఘన విజయం

ముంబై ఇండియన్స్ ఐపీఎల్ 2026 లో వరుస పరాజయాలకు చెక్ పెడుతూ కీలక విజయాన్ని నమోదు చేసింది. గుజరాత్ టైటాన్స్పై అహ్మదాబాద్‌లో జరిగిన మ్యాచ్‌లో ముంబై 99 పరుగుల తేడాతో ఘన విజయం సాధించింది. ముందుగా బ్యాటింగ్ చేసిన ముంబైకి ఆరంభంలోనే షాక్ తగిలింది. అయితే తిలక్ వర్మ (101 నాటౌట్) అద్భుత సెంచరీతో జట్టును ఆదుకున్నాడు. అతనికి తోడుగా నమన్ ధిర్ (45) కీలక ఇన్నింగ్స్ ఆడడంతో ముంబై 20 ఓవర్లలో 199/5 భారీ స్కోర్ చేసింది. చివరి ఓవర్లో తిలక్ వరుస బౌండరీలు, సిక్సర్లతో శతకం పూర్తి చేసి జట్టుకు బలమైన స్కోర్ అందించాడు.

200 పరుగుల లక్ష్యంతో బరిలోకి దిగిన గుజరాత్ ప్రారంభంలోనే కుదేలైంది. జస్ప్రీత్ బుమ్రా తొలి ఓవర్లోనే సాయి సుదర్శన్‌ను ఔట్ చేసి ఒత్తిడి పెంచాడు. అనంతరం అశ్వనీ కుమార్ (4/24) గుజరాత్ మిడిల్ ఆర్డర్‌ను పూర్తిగా కూల్చేశాడు. శాంట్నర్ కూడా కీలక వికెట్లు తీసి ప్రత్యర్థిని మరింత ఇబ్బందుల్లోకి నెట్టాడు. తెవాటియా, షారుఖ్ ఖాన్ కొద్దిసేపు ప్రతిఘటన చూపించినా అశ్వనీ కుమార్ వరుస వికెట్లతో వారి ఆశలను చెదరగొట్టాడు. చివరకు గుజరాత్ జట్టు కేవలం 100 పరుగులకే ఆలౌట్ అయి భారీ ఓటమి చవిచూసింది.

ఈ విజయంతో ముంబై ఇండియన్స్ మళ్లీ గెలుపు బాట పట్టగా, తిలక్ వర్మ సెంచరీ ఈ మ్యాచ్‌కు హైలైట్‌గా నిలిచింది.