

ఎంఎస్ ధోనీ సంచలన నిర్ణయంతో ఐపీఎల్కు వీడ్కోలు పలికినట్లు వచ్చిన వార్తలు అభిమానులను ఆశ్చర్యానికి గురిచేశాయి. అయితే, చెన్నై సూపర్ కింగ్స్కు మెంటార్గా కొత్త బాధ్యతలు చేపట్టనున్నట్లు సమాచారం. ఈ నేపథ్యంలో ప్రస్తుత, మాజీ క్రికెటర్లు ధోనీపై ప్రశంసల వర్షం కురిపిస్తున్నారు. భారత క్రికెట్తో పాటు ఐపీఎల్లో అతడు అందించిన సేవలను గుర్తుచేసుకుంటున్నారు. టీమిండియా మాజీ కెప్టెన్ రోహిత్ శర్మ సోషల్ మీడియా వేదికగా ధోనీతో తనకున్న అనుబంధాన్ని గుర్తుచేసుకుంటూ భావోద్వేగపూరిత పోస్టు పెట్టాడు. మైదానంలో, మైదానం వెలుపల ధోనీతో కలిసి పంచుకున్న జ్ఞాపకాలు జీవితాంతం గుర్తుండిపోతాయని పేర్కొన్నాడు. అతడిపై తనకున్న గౌరవం ఎప్పటికీ తగ్గదని తెలిపాడు.
మరోవైపు, బీసీసీఐ వైస్ ప్రెసిడెంట్ రాజీవ్ శుక్లా కూడా ధోనీ సేవలను కొనియాడారు. ఐపీఎల్ ఎదుగుదల, విజయాల్లో ధోనీ కీలక పాత్ర పోషించాడని, నాయకుడిగా అతడు సాధించిన విజయాలు యువ క్రికెటర్లకు స్ఫూర్తినిస్తాయని పేర్కొన్నారు. పాకిస్థాన్ మాజీ క్రికెటర్ రషీద్ లతీఫ్ సైతం ధోనీని అత్యంత విజయవంతమైన సారథిగా అభివర్ణించారు. ప్రసిద్ధ నంబర్ 7 జెర్సీతో పసుపు రంగు దుస్తుల్లో సీఎస్కేకు ఎన్నో విజయాలు అందించాడని కొనియాడారు. ఇకపై మైదానంలో ధోనీ ఆటను చూడలేకపోయినా, చెపాక్లో అతడి ప్రభావం కొనసాగుతుందని అభిప్రాయపడ్డారు. రాబోయే తరానికి మెంటార్గా ధోనీ మార్గనిర్దేశం చేయడం భారత క్రికెట్కు ఎంతో ఉపయోగకరమని పేర్కొంటూ అతడికి శుభాకాంక్షలు తెలిపారు.














కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!