

ఇండియన్ ప్రీమియర్ లీగ్లో ప్రముఖ ఫ్రాంచైజీ అయిన కోల్కతా నైట్ రైడర్స్ (కేకేఆర్) యాజమాన్యంలో కీలక మార్పు చోటుచేసుకోనున్నట్లు వార్తలు వస్తున్నాయి. ఆ జట్టు సహ యజమాని, బాలీవుడ్ నటి జూహీ చావ్లా భర్త జయ్ మెహతా తన వాటాలో సగాన్ని విక్రయించేందుకు ఒప్పందం కుదుర్చుకున్నట్లు సమాచారం. ప్రస్తుతం కేకేఆర్లో జయ్ మెహతాకు 45 శాతం వాటా ఉండగా, బాలీవుడ్ స్టార్ షారుక్ ఖాన్కు 55 శాతం వాటా ఉంది. జయ్ మెహతా తన వాటాలోని 22.5 శాతాన్ని అమెరికాకు చెందిన పెట్టుబడి సంస్థ అరెస్ మేనేజ్మెంట్కు విక్రయిస్తున్నట్లు తెలుస్తోంది. ఈ డీల్ విలువ 400 మిలియన్ డాలర్లు.. అంటే భారత కరెన్సీలో సుమారు రూ.3,737 కోట్లు. ఇటీవల ఓ సంస్థ కేకేఆర్ మొత్తం విలువను సుమారు రూ.16,634 కోట్లుగా అంచనా వేసినట్లు సమాచారం.
2007లో షారుక్ ఖాన్, జయ్ మెహతా, జూహీ చావ్లా కలిసి ప్రమోటర్లుగా కోల్కతా నైట్ రైడర్స్ స్పోర్ట్స్ ప్రైవేట్ లిమిటెడ్ను ఏర్పాటు చేశారు. ఐపీఎల్ తొలి సీజన్కు ముందే ఈ ఫ్రాంచైజీని సొంతం చేసుకున్నారు. ఇప్పుడు అమెరికాలో పలు స్పోర్ట్స్ క్లబ్లలో పెట్టుబడులు కలిగిన అరెస్ మేనేజ్మెంట్తో జయ్ మెహతా ఒప్పందం కుదుర్చుకున్నట్లు క్రికెట్ వర్గాలు చెబుతున్నాయి. ఈ లావాదేవీ పూర్తిగా నగదు రూపంలో జరగనుందని, ప్రస్తుతం చివరి దశలో ఉందని సమాచారం. అయితే, ఈ వాటా విక్రయానికి భారత క్రికెట్ నియంత్రణ మండలి (బీసీసీఐ) అధికారిక అనుమతి తప్పనిసరి. ఈ ఒప్పందం ద్వారా బీసీసీఐకి కూడా ఆదాయం సమకూరనుంది. లావాదేవీ మొత్తం విలువలో ఐదు శాతం బీసీసీఐకి దక్కనున్నట్లు తెలుస్తోంది. ఈ డీల్కు అధికారిక ఆమోదం లభిస్తే కేకేఆర్ యాజమాన్య నిర్మాణంలో కీలక మార్పు చోటుచేసుకోనుంది.




















కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!