కొండా సురేఖ కుటుంబంపై తిరుగుబాటు.. టీపీసీసీకి కీలక తీర్మానం!

ఉమ్మడి వరంగల్‌ జిల్లాలో కాంగ్రెస్‌ పార్టీలో కొండా సురేఖ కుటుంబానికి, ఇతర పార్టీ నాయకులకు మధ్య కొనసాగుతున్న విభేదాలు మరోసారి తెరపైకి వచ్చాయి. ఇటీవల కొండా సుష్మిత చేసిన వ్యాఖ్యలను కారణంగా చూపుతూ కొండా సురేఖ కుటుంబం మొత్తాన్ని కాంగ్రెస్‌ పార్టీ నుంచి సస్పెండ్‌ చేయాలని ఆమె వ్యతిరేక వర్గానికి చెందిన నాయకులు డిమాండ్‌ చేస్తున్నట్లు సమాచారం. ఈ నేపథ్యంలో కొండా సురేఖకు వ్యతిరేకంగా ఉన్న వరంగల్‌ జిల్లాకు చెందిన ఎమ్మెల్యేలు, కాంగ్రెస్‌ నాయకులు ప్రత్యేకంగా సమావేశమైనట్లు తెలుస్తోంది.

సమావేశంలో కొండా కుటుంబాన్ని పార్టీ నుంచి సస్పెండ్‌ చేయాలని తీర్మానం చేసి తెలంగాణ ప్రదేశ్‌ కాంగ్రెస్‌ కమిటీకి పంపినట్లు సమాచారం. కాంగ్రెస్‌ ప్రభుత్వం ఏర్పడినప్పటి నుంచి ఉమ్మడి వరంగల్‌ జిల్లాలో కొండా సురేఖకు, ఇతర కాంగ్రెస్‌ నాయకులకు మధ్య పలు అంశాల్లో విభేదాలు కొనసాగుతున్నాయి. తాజాగా కొండా సుష్మిత వ్యాఖ్యలు ఈ విభేదాలకు మరింత ఆజ్యం పోశాయని పార్టీ వర్గాల్లో చర్చ జరుగుతోంది. తాజా పరిణామాలతో వరంగల్‌ కాంగ్రెస్‌లో అంతర్గత విభేదాలు మరోసారి చర్చనీయాంశంగా మారాయి.