రాహుల్ విమర్శలకు నిర్మల ఘాటు సమాధానం

ఐడీబీఐ బ్యాంక్‌లో మెజారిటీ వాటా విక్రయానికి కేంద్ర ప్రభుత్వం తీసుకున్న నిర్ణయం రాజకీయంగా వివాదానికి దారితీసింది. ప్రభుత్వరంగ బ్యాంకులను ప్రైవేటీకరించడం వల్ల ఉద్యోగులతో పాటు దేశానికి నష్టం కలుగుతుందని కాంగ్రెస్ అగ్రనేత రాహుల్ గాంధీ విమర్శించగా, కేంద్ర ఆర్థికమంత్రి నిర్మలా సీతారామన్ ఆ ఆరోపణలను తిప్పికొట్టారు. కాంగ్రెస్ పాలనలోనే ప్రభుత్వరంగ బ్యాంకుల ఆర్థిక పరిస్థితి దెబ్బతిన్నదని ఆమె ఆరోపించారు. కింగ్‌ఫిషర్, వీడియోకాన్, ఏబీజీ షిప్‌యార్డ్ వంటి సంస్థలకు రాజకీయ పలుకుబడితో వేల కోట్ల రూపాయల రుణాలు మంజూరయ్యాయని విమర్శించారు. 1957 నాటి ముంద్రా కుంభకోణం నుంచి యూపీఏ పాలన వరకు బ్యాంకుల్లో రాజకీయ జోక్యం జరిగిందని ఆమె పేర్కొన్నారు. పలుకుబడి ఉన్నవారికి ప్రాధాన్యం ఇచ్చి, సామాన్య రుణగ్రహీతలకు కఠిన నిబంధనలు అమలు చేశారని ఎద్దేవా చేశారు. సంజయ్ గాంధీకి సన్నిహితులైన వారికి రుణాలు మంజూరు చేయడానికి నిరాకరించినందుకే 1976లో అప్పటి ఎస్‌బీఐ చైర్మన్ ఆర్.కె. తల్వార్‌ను పదవి నుంచి తొలగించారని కూడా ఆమె ఆరోపించారు.

రాజకీయ ఒత్తిళ్లతో మంజూరైన రుణాల కారణంగా ఐడీబీఐ బ్యాంక్ ఆర్థికంగా తీవ్ర ఇబ్బందుల్లో పడిందని నిర్మలా సీతారామన్ అన్నారు. ఎన్డీయే ప్రభుత్వం రూ.25 వేల కోట్లకు పైగా మూలధనాన్ని సమకూర్చి బ్యాంకు పునరుద్ధరణకు చర్యలు తీసుకుందని వివరించారు. ఐడీబీఐ వాటా విక్రయ ప్రక్రియలో పూర్తి పారదర్శకత పాటించామని, రెండో విడత బిడ్డింగ్‌లో బ్యాంకు విలువ రూ.3,917 కోట్లు పెరిగిందని పేర్కొన్నారు. రాఫెల్ వ్యవహారంలో చేసినట్లుగానే ఐడీబీఐ విషయంలోనూ రాహుల్ గాంధీ ఆరోపణలు నిలబడవని విమర్శించారు. కాగా, ఐడీబీఐ బ్యాంక్‌లో 60.72 శాతం వాటాను ఫెయిర్‌ఫాక్స్ ఫైనాన్షియల్ హోల్డింగ్స్ అనుబంధ సంస్థకు సుమారు రూ.52,878 కోట్లకు విక్రయించేందుకు కేంద్ర క్యాబినెట్ ఆమోదం తెలిపింది. ఇందులో కేంద్ర ప్రభుత్వానికి చెందిన 30.48 శాతం, ఎల్‌ఐసీకి చెందిన 30.24 శాతం వాటాలు ఉన్నాయి. ఈ లావాదేవీ పూర్తయిన తర్వాత కేంద్రం 15 శాతం, ఎల్‌ఐసీ 19 శాతం వాటాలను కొనసాగించనున్నాయి. అయితే ఈ ఒప్పందం సంబంధిత నియంత్రణ సంస్థల అనుమతులు, తుది ప్రక్రియలపై ఆధారపడి ఉంటుంది.