రైల్వే పార్శిల్ బుకింగ్ ఇక మరింత సులభం

ప్రయాణికులకు భారతీయ రైల్వే మరో గుడ్ న్యూస్ చెప్పింది. కొరియర్ సంస్థల తరహాలో ఇంటి వద్ద నుంచే పార్సిళ్లను సేకరించి, గమ్యస్థానానికి నేరుగా చేరవేసే డోర్ టు డోర్ పార్సిల్ డెలివరీ సేవలను ప్రారంభించేందుకు సిద్ధమైంది. ‘ఘర్ సే ఘర్ తక్’ పేరుతో అందుబాటులోకి రానున్న ఈ సేవలను తొలుత దేశంలోని ఎనిమిది ప్రధాన నగరాల్లో ప్రారంభించనుంది. ఢిల్లీ, ముంబై, కోల్‌కతా, చెన్నై, అహ్మదాబాద్, హైదరాబాద్, బెంగళూరు, పుణెల్లో ఈ సదుపాయం అందుబాటులోకి రానుంది. ఇందుకోసం రైల్వే శాఖ ప్రత్యేకంగా ‘రైల్ పార్సిల్ యాప్‌’ను తీసుకురానుంది. ఈ యాప్ ద్వారా పార్సిళ్లను సులభంగా బుక్ చేసుకునే అవకాశం ఉంటుంది.

ఈ విధానంలో రైల్వే శాఖ ప్రైవేట్ లాజిస్టిక్స్ సంస్థలతో కలిసి పనిచేస్తుంది. తొలుత ఆయా సంస్థల ప్రతినిధులు వినియోగదారుల ఇళ్లకు వచ్చి పార్సిళ్లను సేకరించి రైల్వే స్టేషన్‌కు చేరవేస్తారు. అక్కడి నుంచి రైళ్ల ద్వారా గమ్యస్థాన నగరానికి పంపిస్తారు. అనంతరం అక్కడి లాజిస్టిక్స్ సంస్థలు సంబంధిత చిరునామాకు పార్సిళ్లను డెలివరీ చేస్తాయి. యాప్‌లో పార్సిల్ బుకింగ్, లైవ్ ట్రాకింగ్, ఆన్‌లైన్ చెల్లింపుల సదుపాయాలు ఉంటాయి. ప్రతి బుకింగ్‌కు ప్రత్యేకమైన 10 అంకెల పీఆర్‌ఆర్ నంబర్ కేటాయిస్తారు. యూపీఐ, క్రెడిట్ కార్డు, డెబిట్ కార్డు, నెట్ బ్యాంకింగ్ ద్వారా చెల్లింపులు చేయవచ్చు. రైలు బయలుదేరడానికి 15 రోజుల ముందు నుంచి ప్రయాణానికి ఒక రోజు ముందు వరకు బుకింగ్ చేసుకోవచ్చు. పార్సిల్‌ను సేకరించకముందే బుకింగ్ రద్దు చేస్తే, రూ.10 క్లరికేజ్ ఛార్జీ మినహాయించి రైల్వే రవాణా ఛార్జీని తిరిగి చెల్లిస్తారు. ఈ సేవలు చిన్న వ్యాపారులు, ఆన్‌లైన్ విక్రేతలు, సాధారణ వినియోగదారులకు ప్రయోజనకరంగా ఉండనున్నాయి.