ఏపీలో మందుబాబులకు షాక్!

ఆంధ్రప్రదేశ్‌లో జరగనున్న మున్సిపల్ ఎన్నికల నేపథ్యంలో రాష్ట్రవ్యాప్తంగా వైన్ షాపులు మూతపడనున్నాయి. అక్టోబర్ 30వ తేదీ సాయంత్రం 5 గంటల నుంచి నవంబర్ 1వ తేదీ సాయంత్రం 5 గంటల వరకు మద్యం అమ్మకాలపై నిషేధం అమల్లో ఉంటుంది. పోలింగ్‌కు ముందు 48 గంటల పాటు మద్యం విక్రయాలపై ఆంక్షలు విధించడంతో ఈ నిర్ణయం తీసుకున్నారు. నవంబర్ 1వ తేదీ సాయంత్రం వైన్ షాపులు తిరిగి తెరుచుకోనున్నప్పటికీ, ఓట్ల లెక్కింపు జరిగే నవంబర్ 3వ తేదీన మరోసారి మూతపడనున్నాయి. కౌంటింగ్ ప్రక్రియ సాయంత్రం పూర్తయ్యే వరకు మద్యం అమ్మకాలపై నిషేధం కొనసాగుతుంది.

ఎన్నికల ప్రవర్తనా నియమావళిలో భాగంగా ఈ ఆంక్షలు అమలు చేస్తున్నారు. ఎన్నికలు ప్రశాంతంగా, పారదర్శకంగా జరిగేలా అధికారులు ఇప్పటికే చర్యలు చేపట్టారు. పోలింగ్ కేంద్రాల వద్ద ఎలాంటి అవాంఛనీయ ఘటనలు చోటుచేసుకోకుండా కట్టుదిట్టమైన భద్రతా ఏర్పాట్లు చేస్తున్నారు. నామినేషన్ల సమయంలోనే రాజకీయ పార్టీల మధ్య తీవ్ర ఉద్రిక్తతలు చోటుచేసుకున్న నేపథ్యంలో, పోలింగ్ రోజున అలాంటి ఘటనలు పునరావృతం కాకుండా అధికారులు ముందస్తు జాగ్రత్తలు తీసుకుంటున్నారు. శాంతిభద్రతలకు విఘాతం కలగకుండా ప్రత్యేక నిఘా ఏర్పాటు చేస్తున్నారు.