భారత్‌ ప్రపంచం లో మూడో అతిపెద్ద ఆర్థిక వ్యవస్థగా మారబోతోంది: ప్రధాని మోడీ

భారతదేశం వేగంగా ఆర్థికంగా ఎదుగుతూ ప్రపంచంలో మూడో అతిపెద్ద ఆర్థిక వ్యవస్థగా అవతరించబోతోందని ప్రధాని నరేంద్ర మోదీ తెలిపారు. దేశ అభివృద్ధి దిశగా అన్ని రంగాల్లో గణనీయమైన పురోగతి కనిపిస్తోందని ఆయన స్పష్టం చేశారు.

వ్యవసాయ రంగంలో భారత్ కొత్త రికార్డులు సృష్టిస్తున్నదని ప్రధాని పేర్కొన్నారు. పంటల ఉత్పత్తి స్థాయిలు చరిత్రలో ఎన్నడూ లేని విధంగా పెరుగుతున్నాయని, రైతుల కృషికి ఇది స్పష్టమైన నిదర్శనమని అన్నారు. ముఖ్యంగా పాల ఉత్పత్తిలో భారత్ ప్రపంచంలోనే అగ్రస్థానంలో కొనసాగుతోందని చెప్పారు.

అదేవిధంగా, ఔషధ రంగంలోనూ భారత్ కీలక పాత్ర పోషిస్తోందని ప్రధాని మోదీ వివరించారు. జనరిక్ మెడిసిన్ ఉత్పత్తిలో భారత్ ప్రపంచానికి మార్గదర్శిగా నిలుస్తోందని, తక్కువ ధరలకు నాణ్యమైన ఔషధాలు అందించడం ద్వారా అనేక దేశాలకు భారత్ ఆరోగ్య భద్రతను కల్పిస్తోందని ఆయన అన్నారు.

ఈ అన్ని అంశాలు భారతదేశం అత్యంత వేగంగా అభివృద్ధి చెందుతున్న దేశాల్లో ఒకటిగా నిలవడానికి కారణమవుతున్నాయని ప్రధాని పేర్కొన్నారు. బలమైన ఆర్థిక విధానాలు, ఉత్పాదక రంగాల విస్తరణ, ఆత్మనిర్భర్ భారత్ లక్ష్యమే దేశాన్ని భవిష్యత్తులో ప్రపంచ ఆర్థిక శక్తిగా తీర్చిదిద్దుతుందని ఆయన విశ్వాసం వ్యక్తం చేశారు.