ఏపీ మున్సిపల్‌ ఎన్నికల కౌంటింగ్‌.. అత్యధిక స్థానాల్లో కూటమి ఆధిక్యం

ఆంధ్రప్రదేశ్‌ వ్యాప్తంగా మున్సిపల్‌ ఎన్నికల ఓట్ల లెక్కింపు కొనసాగుతోంది. తొలుత పోస్టల్‌ బ్యాలెట్‌ ఓట్లను లెక్కించిన అధికారులు.. అనంతరం వార్డులు, డివిజన్ల వారీగా సాధారణ ఓట్ల లెక్కింపును చేపట్టారు. ఇప్పటివరకు వెల్లడైన ప్రారంభ ట్రెండ్స్‌ ప్రకారం అత్యధిక స్థానాల్లో కూటమి అభ్యర్థులు ఆధిక్యంలో కొనసాగుతున్నారు. మేయర్‌ అభ్యర్థుల్లో విశాఖపట్నంలో ముక్కా శ్రావణి, గుంటూరులో కోవెలమూడి లక్ష్మీ అపర్ణ, విజయనగరంలో అవనాపు భార్గవి, చిత్తూరులో కఠారి హేమలత, కర్నూలులో విజయ ప్రత్యూష ముందంజలో ఉన్నారు. ఏలూరులో జనసేన మేయర్‌ అభ్యర్థి రెడ్డి అప్పలనాయుడు ఆధిక్యంలో కొనసాగుతున్నారు.

మున్సిపాలిటీల్లోనూ కూటమి అభ్యర్థులే ఎక్కువ చోట్ల ముందంజలో ఉన్నారు. నర్సీపట్నం, పెనుకొండ, వెంకటగిరి, నందిగామ, జగ్గయ్యపేట, నందికొట్కూరు, సూళ్లూరుపేట, నాయుడుపేట, నూజివీడు, మార్కాపురం, ఎమ్మిగనూరు, మాచర్ల, డోన్‌, బొబ్బిలి, పెద్దాపురం, ఇచ్ఛాపురం, పలాస తదితర మున్సిపాలిటీల్లో తెదేపా అభ్యర్థులు ఆధిక్యంలో ఉన్నారు. అమలాపురం, మడకశిర, నరసాపురం, తిరువూరు, గొల్లప్రోలు, సామర్లకోట, తెనాలి, ముమ్మిడివరం, పిఠాపురం, చిలకలూరిపేట, పుత్తూరు, పెడన, పుట్టపర్తిలో జనసేన అభ్యర్థులు ముందంజలో కొనసాగుతున్నారు. గిద్దలూరు, ఎలమంచిలిలో భాజపా అభ్యర్థులు ఆధిక్యంలో ఉన్నారు. ఇవి ప్రాథమిక ట్రెండ్స్‌ మాత్రమేనని, పూర్తిస్థాయి కౌంటింగ్‌ అనంతరం తుది ఫలితాలు వెల్లడికానున్నాయి.