విమాన టికెట్ల ధరలపై సుప్రీంకోర్టు కీలక వ్యాఖ్యలు.. ప్రయాణికులకు షాక్!

పండుగల సీజన్‌కు ముందు దేశీయ విమాన టికెట్ ధరలు దాదాపు 700 శాతం పెరిగాయని ఆరోపిస్తూ దాఖలైన పిటిషన్‌పై అత్యవసర విచారణ చేపట్టేందుకు సుప్రీంకోర్టు సోమవారం నిరాకరించింది. ఈ సందర్భంగా విమాన టికెట్ల ధరలు భారీగా పెరిగిన విషయాన్ని ఓ న్యాయవాది ధర్మాసనం దృష్టికి తీసుకెళ్లారు. దీనిపై స్పందించిన న్యాయమూర్తులు ‘విమానంలో ప్రయాణించకండి’ అని వ్యాఖ్యానించినట్లు సమాచారం. విమాన ప్రయాణం ప్రస్తుతం అత్యవసర సేవగా మారిందని, ఇష్టానుసారంగా ధరలు పెంచడం రాజ్యాంగంలోని ఆర్టికల్ 14కు విరుద్ధమని పిటిషనర్ వాదించారు. ఈ అధికరణం చట్టం ముందు సమానత్వానికి హామీ ఇస్తుంది.

విమాన టికెట్ ధరల్లో ఆకస్మిక మార్పులను నియంత్రించేందుకు ప్రత్యేక విధానం రూపొందించాలని పిటిషన్‌లో కోరారు. అలాగే విమానయాన సంస్థలు ధరల వివరాలను పారదర్శకంగా వెల్లడించేలా చర్యలు తీసుకోవాలని విజ్ఞప్తి చేశారు. ఎకానమీ క్లాస్ ప్రయాణికులకు గతంలో ఉన్న 25 కిలోల ఉచిత చెక్‌-ఇన్ బ్యాగేజీ పరిమితిని తిరిగి అమలు చేయాలని కూడా కోరారు. విమాన ప్రయాణం సామాన్యులకు అందుబాటులో ఉండేలా ధరల నియంత్రణ అవసరమనే అంశాన్ని ఈ పిటిషన్ ప్రధానంగా ప్రస్తావించింది. అయితే అత్యవసర విచారణకు నిరాకరించడం పిటిషన్‌లోని అంశాలపై తుది తీర్పు ఇచ్చినట్లు కాదు.