హార్దిక్‌ పాండ్య రీఎంట్రీపై గిల్‌ కీలక అప్‌డేట్‌..

టీమ్‌ఇండియా ఆల్‌రౌండర్‌ హార్దిక్‌ పాండ్య వరుస గాయాల కారణంగా గత కొన్ని నెలలుగా అంతర్జాతీయ క్రికెట్‌కు దూరంగా ఉంటున్నాడు. వచ్చే ఏడాది జరగనున్న వన్డే ప్రపంచకప్‌ను దృష్టిలో పెట్టుకుని అతడి పునరాగమనంపై అభిమానులు ఆసక్తిగా ఎదురుచూస్తున్నారు. ఈ నేపథ్యంలో పాండ్య రీఎంట్రీపై భారత జట్టు కెప్టెన్‌ శుభ్‌మన్‌ గిల్‌ కీలక అప్‌డేట్‌ ఇచ్చాడు. జాతీయ జట్టులోకి తిరిగి రావడానికి ముందు పాండ్య కొన్ని దేశవాళీ మ్యాచ్‌లు ఆడి తన ఫిట్‌నెస్‌ను నిరూపించుకోవాల్సి ఉంటుందని స్పష్టం చేశాడు. ఇండియా-ఎ తరఫున బరిలోకి దిగేందుకు సిద్ధమవుతున్న సమయంలోనూ అతడికి మరోసారి చిన్నపాటి గాయం కావడంతో పునరాగమనం ఆలస్యమైందని వెల్లడించాడు.

న్యూజిలాండ్‌తో ఐదు వన్డేల సిరీస్‌కు ముందు నిర్వహించిన ప్రెస్‌ కాన్ఫరెన్స్‌లో గిల్‌ మాట్లాడుతూ.. పాండ్య జట్టుకు ఎంతో కీలకమైన ఆటగాడని పేర్కొన్నాడు. అతడు తిరిగి వస్తే 7, 8 స్థానాల్లో బ్యాటింగ్‌ సమస్య తీరడంతో పాటు జట్టుకు మెరుగైన సమతూకం లభిస్తుందని అభిప్రాయపడ్డాడు. కొత్త బంతితో పాటు పాత బంతితోనూ బౌలింగ్‌ చేయగల సామర్థ్యం పాండ్య ప్రత్యేకత అని ప్రశంసించాడు. ఇక న్యూజిలాండ్‌తో వన్డే సిరీస్‌లో టాప్‌-4లో తాను, రోహిత్‌ శర్మ, విరాట్‌ కోహ్లీ, శ్రేయస్‌ అయ్యర్‌ ఉంటారని గిల్‌ స్పష్టం చేశాడు. మిడిలార్డర్‌లో మ్యాచ్‌ పరిస్థితులను బట్టి అక్షర్‌ పటేల్‌, కేఎల్‌ రాహుల్‌లను ఉపయోగించుకుంటామని తెలిపాడు.