జనగణనలో నిబంధనలు ఉల్లంఘిస్తే చర్యలు తప్పవు

జనగణన–2027లో భాగంగా ప్రజలను ఉద్దేశపూర్వకంగా ఇబ్బందికి గురిచేసే, అభ్యంతరకరమైన లేదా అసంబద్ధమైన ప్రశ్నలు అడిగే అధికారులపై కఠిన చర్యలు తప్పవని రిజిస్ట్రార్ జనరల్ ఆఫ్ ఇండియా హెచ్చరించింది. ఈ ప్రక్రియలో పాల్గొనే సమయంలో ప్రజలను ఇబ్బందిపెట్టే విధంగా ప్రశ్నలు అడిగే అధికారులకు రూ.1,000 వరకు జరిమానాతో పాటు మూడేళ్ల వరకు జైలు శిక్ష విధించే అవకాశం ఉందని చట్టం పేర్కొంటుందని తెలిపారు.

ఈ మేరకు రాష్ట్రాలకు పంపిన ఉత్తర్వుల్లో రిజిస్ట్రార్ జనరల్ అండ్ సెన్సస్ కమిషనర్ మృత్యుంజయ కుమార్ నారాయణ్ స్పష్టం చేశారు. జనగణన సమయంలో అధికారులు విధిగా నిబంధనలను పాటించాలని, ప్రజల గౌరవాన్ని కాపాడాలని ఆయన సూచించారు.