టీమ్ఇండియా యువ క్రికెటర్ వైభవ్ సూర్యవంశీకి ప్రధాన మంత్రి రాష్ట్రీయ బాల పురస్కార్!

టీమ్ఇండియా యువ క్రికెటర్ వైభవ్ సూర్యవంశీకి పిల్లల కోసం అందించే అత్యున్నత పౌర పురస్కారమైన ప్రధాన మంత్రి రాష్ట్రీయ బాల పురస్కార్ లభించింది. చిన్న వయసులోనే క్రికెట్‌లో చూపిన అసాధారణ ప్రతిభ, క్రీడపై అతని అంకితభావానికి గుర్తింపుగా ఈ గౌరవాన్ని అందించారు. రాష్ట్రపతి ద్రౌపది ముర్ము చేతుల మీదుగా వైభవ్ ఈ అవార్డును స్వీకరించాడు. ఇది అతని క్రీడా జీవితంలో ఒక ముఖ్యమైన మైలురాయిగా నిలిచింది.

వైభవ్ సూర్యవంశీ 2025లో తన అసాధారణ బ్యాటింగ్‌తో అరుదైన రికార్డులు నెలకొల్పాడు. కేవలం 14 ఏళ్ల వయసులోనే ఐపీఎల్‌, యూత్ వన్డే, యూత్ టెస్ట్‌, ఇండియా-ఏ, స్మాట్‌, అండర్-19 ఆసియా కప్‌, విజయ్ హజారే ట్రోఫీ వంటి అన్ని స్థాయిల్లో శతకాలు నమోదు చేసి ప్రత్యేక గుర్తింపు సంపాదించాడు. ఇటీవల ఓ మ్యాచ్‌లో కేవలం 60 బంతుల్లోనే 190 పరుగులు చేసి క్రికెట్ వర్గాల్లో సంచలనం సృష్టించాడు. ఈ ఇన్నింగ్స్‌తో వైభవ్ దేశవ్యాప్తంగా క్రికెట్ అభిమానుల దృష్టిని ఆకర్షించడమే కాకుండా, భవిష్యత్తులో టీమ్ ఇండియాకు కీలక ఆటగాడిగా మారే సామర్థ్యం తనలో ఉందని మరోసారి నిరూపించాడు.