జార్జియాలో కూలిన టర్కీ సైనిక విమానం ... 20 మంది దుర్మరణం

టర్కీకి చెందిన సి-130 మిలిటరీ విమానం దారుణ ప్రమాదానికి గురైంది. ఈ విమానం అజర్‌బైజాన్‌ నుంచి టర్కీకి బయలుదేరి, మార్గమధ్యంలో జార్జియాలోని సిగ్నాఘి ప్రాంతం వద్ద ప్రమాదానికి గురై నేలకూలిపోయింది. గాల్లోనే తీవ్రంగా గింగిరాలు తిరుగుతూ క్షణాల్లో నేలపై పడిపోవడంతో, భయంకరమైన అగ్నిప్రమాదం సంభవించింది. విమానం కూలిన వెంటనే అది మంటలు, పొగలతో పూర్తిగా ఆవృతమైపోయింది. అందులో ప్రయాణిస్తున్న 20 మంది సైనిక సిబ్బంది అందరూ అక్కడికక్కడే ప్రాణాలు కోల్పోయినట్లు సమాచారం. ఈ ఘటనకు సంబంధించిన వీడియోలు సోషల్‌మీడియాలో విస్తారంగా వైరల్ అవుతున్నాయి.

టర్కీ రక్షణ శాఖ, జార్జియా అంతర్గత వ్యవహారాల మంత్రిత్వ శాఖలు ఈ ప్రమాదాన్ని అధికారికంగా ధృవీకరించాయి. సహాయక బృందాలు ఘటనాస్థలికి చేరుకుని, మంటలను ఆర్పే ప్రయత్నాలు చేపట్టాయి. అయితే, మంటలు ఎక్కువగా ఉండడంతో రక్షణ చర్యలు కష్టతరమయ్యాయి.

విమాన ప్రమాదానికి గల కారణాలు ఇప్పటివరకు వెల్లడికాలేదు. ఇంజిన్ లోపం లేదా సాంకేతిక సమస్య కారణమై ఉండొచ్చని అధికారులు అనుమానిస్తున్నారు. టర్కీ ప్రభుత్వం ఈ ఘటనపై దర్యాప్తు ప్రారంభించింది.