విద్యుత్ వినియోగంలో తెలంగాణ ఆల్‌ టైమ్ రికార్డ్

తెలంగాణలో విద్యుత్ వినియోగం కొత్త రికార్డును నమోదు చేసింది. రాష్ట్ర విద్యుత్ సంస్థలు చరిత్రలోనే ఒకే రోజున అత్యధికంగా 341.08 మిలియన్ యూనిట్ల (MU) విద్యుత్‌ను సరఫరా చేసి కొత్త మైలురాయిని చేరుకున్నాయి. ఈ నెల 13, 2026న ఉదయం 11:17 గంటలకు 18,228 మెగావాట్ల గరిష్ట డిమాండ్ నమోదవగా, ఆ డిమాండ్‌ను విజయవంతంగా తీర్చుతూ విద్యుత్ సరఫరా నిర్వహించాయి. ఈ రోజున రాష్ట్రంలో విద్యుత్ వినియోగం అత్యధిక స్థాయికి చేరుకుని గతంలో నమోదైన 335.19 మిలియన్ యూనిట్ల (18 మార్చి 2025) రికార్డును అధిగమించింది. అలాగే గతంలో నమోదైన 17,162 మెగావాట్ల గరిష్ట డిమాండ్ (20 మార్చి 2025) కంటే ఎక్కువగా ఈసారి డిమాండ్ నమోదు కావడం విశేషం.

ఉష్ణోగ్రతలు పెరగడం, వ్యవసాయ అవసరాలు అధికమవడం వంటి కారణాలతో రాష్ట్రంలో విద్యుత్ అవసరం మరియు గరిష్ట లోడ్ రెండూ గణనీయంగా పెరిగినట్లు అధికారులు తెలిపారు. అయినప్పటికీ విద్యుత్ సంస్థలు సమన్వయంతో పనిచేసి నిరంతర విద్యుత్ సరఫరాను కొనసాగించగలిగాయి. ఈ రికార్డు రాష్ట్ర విద్యుత్ వ్యవస్థ సామర్థ్యాన్ని ప్రతిబింబిస్తోందని అధికారులు పేర్కొన్నారు.

రాబోయే రోజుల్లో పెరుగుతున్న విద్యుత్ అవసరాలను దృష్టిలో ఉంచుకుని రాష్ట్ర విద్యుత్ సంస్థలు తమ మౌలిక వసతులను మరింత బలోపేతం చేస్తున్నాయి. రోజుకు 350 మిలియన్ యూనిట్లకు పైగా విద్యుత్ అవసరం మరియు సుమారు 19,000 మెగావాట్ల గరిష్ట లోడ్ను నిర్వహించేందుకు తెలంగాణ సిద్ధంగా ఉందని అధికారులు తెలిపారు. ఈ సందర్భంగా అధిక డిమాండ్ సమయంలో కూడా నిరంతర విద్యుత్ సరఫరాను విజయవంతంగా కొనసాగించిన రాష్ట్రంలోని అన్ని విద్యుత్ సంస్థల సిబ్బందిని ఉప ముఖ్యమంత్రి భట్టి విక్రమార్క ప్రత్యేకంగా అభినందించారు.