సుప్రీం కోర్టు చారిత్రాత్మక తీర్పు

గత 13 ఏళ్లుగా అకస్మారక స్థితిలో ఉన్న 31 ఏళ్ల హరీష్ రాణా ప్రశాంతంగా మరణించేందుకు సుప్రీం కోర్టు అనుమతి ఇచ్చింది. ఒక వ్యక్తికి కారుణ్య మరణానికి (Mercy Death) అనుమతి ఇవ్వడం భారత దేశ చరిత్రలో ఇదే తొలిసారి కావడం గమనార్హం. ఈ తీర్పు దేశవ్యాప్తంగా వైద్య, న్యాయ రంగాల్లో పెద్ద చర్చకు దారితీసింది.

2013లో పంజాబ్ యూనివర్సిటీకి చెందిన విద్యార్థి హరీష్ రాణా, తాను నివసిస్తున్న పేయింగ్ గెస్ట్ హౌజ్ నాలుగో అంతస్తు నుంచి ప్రమాదవశాత్తు కింద పడిపోవడంతో తీవ్ర గాయాలపాలయ్యారు. ఆ ఘటన తర్వాత నుంచి ఆయన లైఫ్ సపోర్ట్‌పై జీవిస్తున్నారు. శ్వాస కోసం ట్రాకియోస్టమీ ట్యూబ్, ఆహారం అందించేందుకు గ్యాస్ట్రోజెజునోస్టమీ ట్యూబ్ సహాయంతో మంచానికే పరిమితమయ్యారు. ఈ కఠిన పరిస్థితుల్లో కూడా హరీష్ రాణా తల్లిదండ్రులు గత 13 ఏళ్లుగా తమ కుమారుడికి నిస్వార్థంగా సేవలు అందిస్తున్నారు.

అయితే ఈ దీర్ఘకాలంలో హరీష్ ఆరోగ్య పరిస్థితిలో ఎలాంటి మార్పు రాలేదని తల్లిదండ్రులు కోర్టుకు తెలిపారు. ఇక కోలుకునే అవకాశం లేకపోవడంతో తన కుమారుడు ప్రశాంతంగా మరణించేందుకు అనుమతి ఇవ్వాలని వారు కోర్టును కోరారు. ఈ కేసుపై సుదీర్ఘ విచారణ జరిపిన అనంతరం, రోగి కోలుకునే అవకాశమే లేని పరిస్థితుల్లో చికిత్సను కొనసాగించాల్సిన అవసరం లేదని పేర్కొంటూ సుప్రీం కోర్టు ఈ చారిత్రాత్మక తీర్పును వెలువరించింది.